एक वर्षभित्र हार्मोनीओएसमा एक लाख एप्स पुर्याउने ह्वावेको लक्ष्य

काठमाडौं ।

अमेरिकाले ब्ल्याकलिस्ट गरेको चिनियाँ प्रविधि कम्पनी ह्वावेले शनिबार केही महिनाभित्रै हार्मोनी अपरेटिङ सिस्टमका लागि १ लाख एप्लिकेसनहरूको लक्ष्य लिएको बताएको छ। यो बताउँदै गर्दा कम्पनीले आत्मनिर्भरता हासिल गर्न व्यापक सहयोग खोजिरहेको बुझिएको छ।

ह्वावेका अध्यक्ष शु झिजुनले शनिबार एक सम्मेलनमा भने, “हार्मोनी मा आधारित १५,००० भन्दा बढी एप्लिकेसनहरू उपभोक्ताको आधारभूत आवश्यकताहरू पूरा गर्न सक्षम छन्, तर प्रणालीलाई अझ व्यक्तिगत र विशेष एप्सको आवश्यकता छ।”

उनले थपे, “हाम्रो विश्लेषणका अनुसार, उपभोक्ताको आवश्यकताहरू पूरा गर्न हार्मोनी इकोसिस्टम परिपक्व हुन १ लाख एप्स एउटा महत्त्वपूर्ण लक्ष्य हो। यो आगामी ६ देखि १२ महिनाको मुख्य उद्देश्य हो।”

रोयटर्सका अनुसार  महत्वाकांक्षी लक्ष्यले चीन र अमेरिकाबीच व्यापारदेखि प्रविधिसम्मका क्षेत्रमा बढ्दो तनावका बीचमा स्वदेशी प्रविधिहरू विकास गर्ने आवश्यकतामा जोड दिएको रोयटर्सले उल्लेख गरेको छ।

ह्वावेले पाँच वर्षअघि हार्मोनी अपरेटिङ सिस्टम सुरु गरेको थियो, जब अमेरिकी प्रतिबन्धले गुगलको एण्ड्रोइड प्रणालीको समर्थन रोकिदिएको थियो। यसपछि शेञ्जेनमा आधारित कम्पनीले हार्मोनी को एक ओपन-सोर्स संस्करण पनि विकास गरेको थियो।

शु ले भने, “अमेरिकी प्रतिबन्धका कारण ह्वावेलाई आफ्नो अपरेटिङ सिस्टम विकास गर्न द्रुत गतिमा अघि बढ्न बाध्य पारिएको छ।” यद्यपि धेरै प्रगति भएको छ, उनले भने, “कुनै पनि अपरेटिङ सिस्टम, चाहे कति नै उन्नत किन नहोस्, यदि कोही त्यसलाई प्रयोग गर्दैन भने, त्यसको कुनै मूल्य हुँदैन।”

उनले डेभलपर्सलाई हार्मोनी मा नयाँ एप्स थप्न मेहनत गर्न आग्रह गरे र सरकारी निकायहरू, सरकारी कम्पनीहरू, र सामाजिक संस्थाहरूलाई आफ्नो काममा हार्मोनी अपरेटिङ सिस्टम प्रयोग गर्न आग्रह गरे।

उपभोक्ताहरूलाई सिस्टमको अपरिपक्वताप्रति सहनशील हुन आग्रह गर्दै उनले भने, “जति धेरै मानिसहरूले यसलाई प्रयोग गर्छन्, उति छिटो यो परिपक्व हुनेछ।”

ह्वावेले अगस्ट २०१९ मा हार्मोनी सार्वजनिक गरेको थियो, तीन महिना पछि जब वाशिंगटनले सुरक्षा सम्बन्धी चिन्ताहरूको कारण व्यापार प्रतिबन्ध लगाएको थियो। ह्वावेले यसको उपकरणहरू जोखिमपूर्ण भएको आरोप अस्वीकार गर्दै आएको छ।

शु ले भने, “पछाडि फर्किने बाटो छैन, विजय यहीँ छ। ह्वावे हार्मोनी इकोसिस्टम विकास गर्न दृढतापूर्वक लगानी गर्नेछ र असम्भवलाई सम्भव बनाउने प्रयास गर्नेछ।”