काठमाडौं ।
अमेरिकामा विद्यालयको नयाँ शैक्षिक सत्र नजिकिँदै गर्दा गुगलले बुधबार जेमिनीमा “गाइडेड लर्निङ” नामक नयाँ टुल सार्वजनिक गर्ने घोषणा गरेको छ। यसको उद्देश्य उत्तर दिने मात्र नभई प्रयोगकर्तालाई गहिरो रूपमा बुझ्न सहयोग गर्नु रहेकाले यो टुलले एआई ट्युटरको जस्तै काम गर्नेछ।
टेकक्रञ्चका अनुसार यो सुविधा ओपनएआईले च्याटजीपीटीमा “स्टडी मोड” सुरु गरेको करिब एक हप्तापछि आएको हो। सो मोडले पनि प्रयोगकर्तालाई केवल प्रश्नको उत्तर दिनुभन्दा अझै अगाडि जान सहयोग गर्दै आलोचनात्मक सोच विकास गर्ने उद्देश्य राखेको छ।
यी दुबै कम्पनीको नयाँ फिचर यस्तो समयमा आएको हो जब एआई च्याटबोटहरूले प्रत्यक्ष उत्तर दिएर सिकाइ प्रक्रियामा बाधा पुर्याउने चिन्ता बढिरहेको छ। गुगल र ओपनएआईका यी नयाँ टुलहरू च्याटबोटलाई उत्तर दिने इन्जिन मात्र होइन, सिकाइ उपकरणका रूपमा स्थापित गर्ने प्रयासको हिस्सा हुन्।
गाइडेड लर्निङमार्फत जेमिनीले समस्यालाई चरणबद्ध रूपमा हल गर्दै प्रयोगकर्ताको आवश्यकताअनुसार व्याख्या अनुकूल बनाउनेछ। यो फिचरले उत्तर दिने मात्र नभई, तस्बिर, चित्र, भिडियो र अन्तरक्रियात्मक क्विज प्रयोग गरेर प्रयोगकर्तालाई ज्ञान विकास गर्न र आफैंलाई परीक्षण गर्न सहयोग गर्नेछ।
गुगलका अनुसार यो फिचरले प्रयोगकर्तालाई कुनै पनि अवधारणाको “किन” र “कसरी” भन्ने प्रश्नको हल पत्ता लगाउन मद्दत गर्नेछ। “तपाईं यदि इन्जाइमसम्बन्धी परीक्षाको तयारी गर्दै हुनुहुन्छ, हाम्रो खाद्य प्रणालीमा मौरीको भूमिकाबारे निबन्ध लेख्दै हुनुहुन्छ, वा फोटोग्राफीप्रतिको रुचि अन्वेषण गर्दै हुनुहुन्छ भने गाइडेड लर्निङ तपाईंका लागि एक साझेदारजस्तै हो, जसले हरेक चरणमा तपाईंलाई बुझ्न सहयोग गर्छ,” गुगलकी भाइस प्रेसिडेन्ट अफ लर्निङ एन्ड सस्टेनेबिलिटी मोरीन हेमेन्सले ब्लग पोस्टमा लेखेकी छन्।
यो नयाँ फिचरसँगै गुगलले जेमिनीलाई समग्र रूपमा अझ प्रभावकारी बनाउने काम गरिरहेको पनि जनाएको छ। अब जेमिनीले स्वतः तस्बिर, चित्र, र युट्युब भिडियोहरूलाई प्रत्यक्ष रूपमा प्रतिक्रियामा समावेश गर्नेछ, जसले प्रयोगकर्तालाई जटिल विषयहरू बुझ्न सजिलो बनाउनेछ।
साथै, प्रयोगकर्ताले जेमिनीलाई आफ्ना क्विज परिणाम वा कक्षा सामग्रीका आधारमा फ्ल्यासकार्ड र अध्ययन गाइड बनाउन पनि भन्न सक्नेछन्।
प्रकाशित: २३ श्रावण २०८२, शुक्रबार
