काठमाडौं ।
क्लाउडफ्लेयरले शुक्रबार डेनो अधिग्रहण गर्ने घोषणा गरेको छ। डेनो सोही नामको प्रोग्रामिङ रनटाइम विकास गर्ने स्टार्टअप हो।
क्लाउडफ्लेयरका केन्टन भार्डाका अनुसार, कम्पनीले यो अधिग्रहणमार्फत आफ्नो वर्कर्स प्रोग्रामिङ मोडल र प्लेटफर्म सुधार गर्नेछ। उक्त प्लेटफर्मले ग्राहकहरूलाई क्लाउडफ्लेयरको नेटवर्कमा सफ्टवेयर निर्माण र सञ्चालन गर्न अनुमति दिन्छ। भार्डा क्लाउडफ्लेयर वर्कर्सका प्रमुख इन्जिनियर हुन्।
टेकक्रञ्चका अनुसार बर्ट बेल्डर र नोड डटकमका निर्माता रायन डालले सहस्थापना गरेको डेनोले हालै वर्कर्सको खुला स्रोत कार्यान्वयन ‘सेल्ड’ सार्वजनिक गरेको थियो। भार्डाले यसले क्लाउडफ्लेयरको टोलीलाई खुसी बनाएको बताएका छन्।
क्लाउडफ्लेयरले आफ्नो वर्कर्स प्लेटफर्मलाई अन्य क्लाउड प्लेटफर्मभन्दा फरक बनाउनुको उद्देश्य ग्राहकलाई आफ्नै प्लेटफर्ममा बाँधेर राख्नु अर्थात् ‘लक-इन’ गर्नु हो भन्ने लोकप्रिय धारणाको खण्डन गर्दै भार्डाले कम्पनीले खुला स्रोत र प्रयोगकर्तालाई अर्को विकल्पमा जान सक्ने सुविधा दिनु राम्रो व्यवसाय भएको विश्वास गर्ने बताएका छन्।
डालले भने आफ्नो टोली “सर्भर निर्माण गर्ने मुख्य माध्यमका रूपमा वर्कर्स प्रोग्रामिङ मोडललाई स्थापित गर्न क्लाउडफ्लेयरमा आबद्ध हुन लागेको” बताएका छन्।
अधिग्रहणको आर्थिक विवरण सार्वजनिक गरिएको छैन। डेनोले सेकोइयाको नेतृत्वमा भएको सिरिज ए लगानीसहित कुल २ करोड ६० लाख अमेरिकी डलर लगानी जुटाएको थियो।
प्रकाशित: २६ आश्विन २०८३, सोमबार
