काठमाडौं ।
अमेरिकी राष्ट्रपति डोनाल्ड ट्रम्पले राष्ट्रिय गुप्तचर निर्देशक जे क्लेटनलाई प्रशासनको एआई प्रमुख नियुक्त गरेको वाल स्ट्रिट जर्नलले शनिबार जनाएको छ। जर्नलले क्लेटनसँगको अन्तर्वार्तालाई उद्धृत गर्दै यस्तो जनाएको हो।
अगस्टमा गुप्तचर प्रमुख नियुक्त भएका क्लेटनले नयाँ ह्वाइट हाउस समितिको नेतृत्व गर्नेछन्। उक्त समितिले एआईबाट उत्पन्न जोखिम र अवसरबारे १२० दिनभित्र प्रतिवेदन दिने जर्नलले जनाएको छ।
“राष्ट्रपतिले एउटा समूह गठन गर्न भन्नुभएको थियो,” क्लेटनले जर्नलसँग भने। प्रशासनले यसलाई “सुपर इन्टेलिजेन्स फोर्स” नाम दिएको छ। यसको उद्देश्य उन्नत एआईमा अमेरिका अग्रणी रहिरहने सुनिश्चित गर्नु र अमेरिकी नागरिकको हितको संरक्षण गर्नु रहेको उनले बताए। “पहिलो स्थानमा नरहनुको जोखिम ठूलो छ,” उनले भने।
रोयटर्सका अनुसार पछिल्ला केही सातामा एआईको सुरक्षा प्रमुख विषय बनेको छ। प्रविधि निर्माण गरिरहेका केही अनुसन्धानकर्ताले एआईले एक दशकभित्र मानिसको ज्यान लिन सक्ने चेतावनी दिएका छन्। यस विषयमा डेमोक्र्याट र रिपब्लिकन दुवै दलका केही सांसदले चिन्ता व्यक्त गर्दै थप कदम चाल्न आह्वान गरेका छन्।
ट्रम्पले एआई नियमनमा भने केही नरम नीति अपनाएको देखिन्छ। अत्यधिक निगरानीले चीनसँगको प्रतिस्पर्धामा अमेरिकाको क्षमता कमजोर पार्न सक्ने उनको तर्क छ। मंगलबार उनले एआई प्रविधिको नियमनका विषयमा चिनियाँ राष्ट्रपति सी चिनफिङसँग सहकार्य गर्न नचाहेको बताएका थिए।
जर्नलका अनुसार क्लेटन नेतृत्वको समितिले एआईसँग सम्बन्धित जोखिम तथा सुरक्षा कमजोरी, ह्याकिङ र अन्य घटनाबारे सरकारको हालको प्रतिवेदन प्रणालीको समीक्षा गर्नेछ। साथै, विद्यमान अधिकारअन्तर्गत संघीय सरकारको प्रतिक्रिया क्षमता बलियो बनाउने उपायबारे सिफारिस गर्नेछ।
ट्रम्पले आफ्नो प्रशासनमा एआईसँग सम्बन्धित निर्णयको निगरानी गर्न सल्लाहकार नियुक्त गरेको यो दोस्रोपटक हो। ट्रम्पको दोस्रो कार्यकालको सुरुवातमा भेन्चर क्यापिटलिस्ट डेभिड स्याक्सले एआई प्रमुखको भूमिका सम्हालेका थिए।
रिपोर्टका अनुसार कार्यदलका उपाध्यक्षमा एमिल माइकल, स्कट कुपोर र फेडरल ट्रेड कमिसनका अध्यक्ष एन्ड्र्यु फर्गुसन रहनेछन्। सदस्यमा उपराष्ट्रपति जेडी भान्स, रक्षामन्त्री पिट हेगसेथ, अर्थमन्त्री स्कट बेसेन्ट र ह्वाइट हाउसका प्रमुख कर्मचारी सुसी वाइल्स रहनेछन्। बाह्य सल्लाहकारमा स्याक्स र पूर्व विदेशमन्त्री कोन्डोलिजा राइस पनि रहने जर्नलले जनाएको छ।
प्रकाशित: १९ आश्विन २०८३, सोमबार
