काठमाडौं ।
एआई एजेन्टले नियन्त्रण बाहिर गएर विभिन्न साइबर गतिविधि गरिरहेका नयाँ घटनाहरू हरेक दिन सार्वजनिक भइरहेका छन्। हगिङ फेसमा रहेको प्रणालीमा पहुँच बनाउने, जिमको वेबसाइट ह्याक गर्ने वा नक्कली प्रोफाइल बनाएर सामाजिक इन्जिनियरिङमार्फत प्रणालीमा प्रवेश गर्ने जस्ता घटनामा एआई मोडलको प्रयोग बढिरहेको छ।
ह्याकिङमा प्रयोग भइरहेका एआई मोडल निर्माण गर्ने एआई कम्पनीहरूले आफ्नो साइबर सुरक्षा सेवा विस्तार गरिरहेका छन्। यही क्रममा ओपनएआईले यसै साता आफ्नो साइबर सुरक्षा सेवा डे-ब्रेक विस्तार गर्ने घोषणा गरेको छ।
कम्पनीले यस वर्षको सुरुवातमा यो सेवा सुरु गरेको थियो। त्यसको केही समयपछि एन्थ्रोपिकले साइबर सुरक्षामा केन्द्रित मिथोस मोडल सार्वजनिक गरेको थियो।
डे-ब्रेकले साइबर सुरक्षा रक्षकका लागि विभिन्न मोडल, उपकरण र कार्यप्रवाहमा पहुँच उपलब्ध गराउने सेवा हो। यसको विस्तारसँगै रक्षात्मक साइबर सुरक्षाका लागि विशेष रूपमा डिजाइन गरिएको नयाँ साइबर मोडल पनि उपलब्ध हुनेछ।
ओपनएआईले सोमबारदेखि डे-ब्रेकलाई ब्लु र रेड गरी दुई तहमा विभाजन गरिएको जनाएको छ। दुवै तहमा स्वीकृत ग्राहकले ओपनएआईका सीमित पहुँच भएका फ्रन्टियर साइबर मोडल प्रयोग गर्न पाउनेछन्। फ्रन्टियर मोडलहरू हाल उपलब्ध सबैभन्दा उन्नत मोडल हुन्।
फ्रन्टियर मोडललाई लिएर विवाद पनि हुँदै आएको छ। ट्रम्प प्रशासनले यसअघि सुरक्षा चिन्ताका कारण यस्ता मोडल प्रयोग गर्ने विषयमा एआई कम्पनीसँग सहकार्य गर्न खोजेको थियो। ओपनएआईले यसअघि यी मोडलको प्रयोगमा कडा सुरक्षा व्यवस्था लागू गर्दै ग्राहकले गर्न सक्ने काम सीमित गरेको थियो।
दुईमध्ये आधारभूत तह मानिएको ब्लुले साइबर घटनाको प्रतिक्रिया, मालवेयर विश्लेषण र सुरक्षा प्याचको परीक्षणलगायत विभिन्न सेवा उपलब्ध गराउनेछ। ओपनएआईले ब्लुलाई “अधिकांश साइबर सुरक्षा रक्षकका लागि सिफारिस गरिएको सुरुवाती विकल्प” भनेको छ। यसले अधिकांश उद्यमका लागि पर्याप्त हुने कम्पनीको संकेत छ।
रेडले भने अझ व्यापक र सम्भावित रूपमा बढी जोखिमपूर्ण उपकरण उपलब्ध गराउनेछ। कम्पनीले यस तहका प्रयोगकर्तालाई सुरक्षा परीक्षण र कमजोरी अनुसन्धान गर्न डिजाइन गरिएका “विशेष रूपमा प्रशिक्षित साइबर सुरक्षा मोडल” उपलब्ध गराउनेछ।
रेड तहसँगै नयाँ जीपीटी-५.६-साइबर मोडल पनि उपलब्ध हुनेछ। यो मोडल रेड तहमा मात्र प्रयोग गर्न सकिनेछ। कम्पनीका अनुसार जीपीटी-५.६-साइबर जीपीटी-५.६ सोलमा आधारित छ र विशेष साइबर सुरक्षा कार्यका लागि थप क्षमतासहित तयार गरिएको हो।
हाल जीपीटी-५.६-साइबर “विश्वसनीय ग्राहक साझेदार” का लागि मात्र उपलब्ध गराइएको छ। रिपोर्टअनुसार एक्सेन्चर, आईबीएम, क्राउडस्ट्राइक, क्लाउडफ्लेयरलगायत कम्पनी यसका प्रयोगकर्तामा छन्।
एआई एजेन्टबाट हुने जोखिम तीव्र रूपमा बढिरहेको भए पनि आलोचकहरूले एआई कम्पनीका लागि यस्ता घटना आफ्नो साइबर सुरक्षा सेवा प्रवर्द्धन गर्ने अवसर पनि बनेको बताएका छन्। ओपनएआईले पनि आफ्नो विस्तारित डे-ब्रेक सेवाको प्रचार यही आधारमा गरिरहेको छ।
“साइबर सुरक्षा क्षेत्र तीव्र रूपमा परिवर्तन भइरहेको छ।
आक्रमणकारीहरूले अभूतपूर्व गति र स्तरमा साइबर आक्रमण गर्न एआईको प्रयोग बढाउँदै जानेछन्, जसमा पूर्ण रूपमा स्वचालित आक्रमण पनि समावेश छन्,” ओपनएआईले ब्लग पोस्टमा भनेको छ।
“यी क्षमताहरू फैलिँदै जाँदा सुरक्षाकर्मीहरूसँग तयारी गर्ने समय सीमित हुँदै गएको छ।”
यसैबीच, एआई कम्पनीहरूले साइबर सुरक्षा जोखिमलाई सबैभन्दा पहिले र प्रत्यक्ष रूपमा बुझ्ने भएकाले उद्यमहरू आफ्नो सुरक्षा समाधान यिनै कम्पनीबाट खरिद गर्न इच्छुक देखिएका छन्।
प्रकाशित: २९ श्रावण २०८३, शुक्रबार
