काठमाडौं ।
एनभिडियाले सोमबार एआई पूर्वाधारका लागि आवश्यक कम्प्युटिङ क्षमता निर्माण गर्न ५०० अर्ब डलरभन्दा बढी तेस्रो-पक्षीय पुँजी जुटाउने लक्ष्यसहित छ प्रमुख वित्तीय संस्थासँग साझेदारी गरी कम्प्युट फाइनान्सिङ प्लेटफर्म सुरु गरेको जनाएको छ।
एनभिडियाका सीईओ जेन्सेन ह्वाङले एक्समा कम्पनीले सम्भावित सम्झौताहरूको २५ प्रतिशत अर्थात् १२५ अर्ब डलरसम्मको वित्तीय जोखिम वहन गर्ने विकल्प रहेको बताएका छन्।
एआई कम्प्युटिङ क्षमताको बढ्दो मागले संस्थागत लगानीकर्तालाई आकर्षित गरिरहेको यो कदमले देखाएको छ। सरकार, कम्पनी र स्टार्टअपहरू एआईका लागि आवश्यक काम सञ्चालन गर्न डाटा सेन्टर निर्माणमा तीव्र रूपमा लागिरहेका छन्। ठूला प्रविधि कम्पनीहरूले एआईमा हुने खर्च तत्काल घट्ने संकेत नदिएका बेला यस वर्ष उनीहरूको संयुक्त खर्च ७३० अर्ब डलरभन्दा बढी पुग्ने अनुमान गरिएको छ।
रोयटर्सका अनुसार एनभिडियाले वित्तीय प्लेटफर्मका लागि एपोलो, ब्ल्याक रक, ब्ल्याकस्टोन, ब्रुकफिल्ड, गोल्डम्यान साक्स र केकेआरसँग समझदारीपत्रमा हस्ताक्षर गरेको छ।
यो पहलको उद्देश्य फ्रन्टियर एआई विकासकर्ता, उद्यम, सरकार र क्लाउड सेवा प्रदायकलाई एनभिडियामा आधारित पूर्वाधारमा पहुँच विस्तार गर्नुका साथै ठूला सम्पत्ति व्यवस्थापक र निजी पुँजी कम्पनीका लागि लामो अवधिका तथा प्रयोगमा आधारित लगानीका अवसर सिर्जना गर्नु हो।
“यी वित्तीय प्लेटफर्मले ग्राहकलाई ठूलो स्तरमा सीमित कम्प्युटिङ क्षमता प्रयोग गर्न र एआईको युगमा हरेक उद्योग र देशलाई अघि बढाउने एआई फ्याक्ट्री निर्माण गर्न सहयोग गर्नेछन्,” ह्वाङले भने।
एनभिडियाले यी व्यवस्थाले आफ्ना ग्राहकका लागि आकर्षक दरमा ठूलो स्तरमा समर्पित पुँजीको कोष सिर्जना गर्ने जनाएको छ।
कम्पनीले वित्तीय सर्त, प्रत्येक कम्पनीको लगानी प्रतिबद्धता वा योजनाबमोजिमको ५०० अर्ब डलर कहिले परिचालन गर्ने भन्नेबारे जानकारी दिएको छैन।
प्रकाशित: २७ श्रावण २०८३, बुधबार
×
