काठमाडौं ।
इटालीका अधिकारीहरूले ठूलो स्ट्रिमिङ पाइरेसी नेटवर्क बन्द गरेका छन्।
नेटफ्लिक्स, डिज्नी प्लस, स्पोटीफाई लगायतका स्ट्रिमिङ सामग्री अवैध रूपमा पुनःप्रसारण गर्ने एप ‘सिनेमागोल’ पछिल्लो पटक बन्द गरिएको पाइरेट प्लेटफर्म बनेको छ।
इटालीको अर्थ तथा वित्त मन्त्रालय अन्तर्गतको कानुन कार्यान्वयन निकाय गार्डिया डि फिनान्जाले सिनेमागोल एपसँग सम्बन्धित देशभर १०० भन्दा बढी खोजी तथा जफत अभियान सञ्चालन गरेको जनाएको छ।
इटालीका अधिकारीका अनुसार उक्त एप २४ घण्टा सञ्चालनमा रहन्थ्यो र वैध सदस्यताबाट प्राप्त पहुँच कोडहरू नक्कली खातामा पठाएर सिनेमागोलका प्रयोगकर्तालाई सामग्री स्ट्रिम गरिन्थ्यो। गार्डिया डि फिनान्जाका अनुसार एपको डिजाइन यस्तो थियो कि यसले प्लेटफर्महरूको सुरक्षा जाँच छल्न सक्थ्यो र प्रयोगकर्ताको आईपी ठेगानासँग जडान आवश्यक नपर्ने भएकाले यसको ट्र्याक गर्न कठिन हुन्थ्यो।
इटालीको निकायका अनुसार सिनेमागोलको सदस्यता शुल्क वार्षिक ४० देखि १३० युरोसम्म थियो, जुन ४६ देखि १५१ अमेरिकी डलरसम्म पर्छ। भुक्तानी क्रिप्टोकरेन्सी वा नक्कली विदेशी बैंक खाताजस्ता ट्र्याक गर्न कठिन माध्यमबाट गरिन्थ्यो।
गार्डिया डि फिनान्जाले सुरुमा सिनेमागोलबाट करिब ३० करोड युरो अर्थात् करिब ३५ करोड डलर बराबरको आर्थिक क्षति भएको अनुमान गरेको थियो। साथै पाइरेसी एप प्रयोग गर्ने पहिलो १,००० सदस्यलाई पनि लक्षित गरिएको छ, जसमा १५४ देखि ५,००० यूरोसम्म जरिवाना हुन सक्ने बताइएको छ।
सिनेमागोल पूर्ण रूपमा बन्द भएको हो वा होइन भन्ने स्पष्ट छैन। तर इटालीको निकायले अन्य युरोपेली अधिकारीहरूसँग मिलेर डिक्रिप्सन डाटा र एपको स्रोत कोड राखिएका सर्भर जफत गरेको जनाएको छ।
सिनेमागोल माथिको कारबाहीअघि पनि विश्वभरका अधिकारीहरूले अनलाइन पाइरेटेड सामग्री पहुँच गर्न कठिन बनाउने प्रयास गरिरहेका छन्। सन् २०२२ मा चर्चित पाइरेसी साइट पपकर्न टाइम बन्द गरिएको थियो भने अवैध खेल स्ट्रिमिङ सेवा स्ट्रिमइस्टलाई गत वर्ष सेप्टेम्बरमा अफलाइन गरिएको थियो।
प्रकाशित: ११ जेष्ठ २०८३, सोमबार
