काठमाडौं ।
टेस्लाले क्यालिफोर्नियामा आफ्ना सवारीसाधनको मार्केटिङमा “अटोपाइलट” शब्द प्रयोग गर्न बन्द गरेपछि ३० दिनको लाइसेन्स निलम्बनबाट जोगिएको छ।
क्यालिफोर्निया डिपार्टमेन्ट अफ मोटर भेइकल (डीएमभी) ले मंगलबार ढिलै जारी गरेको निर्णयअनुसार टेस्लाको बिक्री र उत्पादन लाइसेन्स ३० दिनका लागि निलम्बन गरिने छैन।
यससँगै झण्डै तीन वर्षदेखि चलिरहेको मुद्दा औपचारिक रूपमा टुंगिएको छ। क्यालिफोर्निया टेस्लाको अमेरिकाभित्रकै सबैभन्दा ठूलो बजार हो।
नोभेम्बर २०२३ मा डीएमभीले अटोपाइलट (आधारभूत उन्नत चालक सहायता प्रणाली) र बढी क्षमतायुक्त फुल सेल्फ-ड्राइभिङ (एफएसडी) सफ्टवेयरको भ्रामक प्रचार गरेको आरोप लगाएको थियो। नियामकले ती शब्दहरूले ग्राहकलाई प्रणालीको वास्तविक क्षमताबारे भ्रमित पारेको दाबी गरेको थियो।
टेस्लाले “फुल सेल्फ-ड्राइभिङ क्यापाबिलिटी” शब्द हटाएर “फुल सेल्फ-ड्राइभिङ (सुपरभाइज्ड)” प्रयोग गर्न थालेको थियो, जसले चालकले निगरानी गर्नैपर्ने स्पष्ट पार्थ्यो। तर कम्पनीले “अटोपाइलट” शब्द प्रयोग जारी राखेपछि डीएमभीले मुद्दा क्यालिफोर्निया अफिस अफ एडमिनिस्ट्रेटिभ हियरिङ्स अन्तर्गत प्रशासनिक कानुन न्यायाधीशसमक्ष पठाएको थियो।
टेकक्रञ्चका अनुसार डिसेम्बरमा प्रशासनिक न्यायाधीशले टेस्लाको बिक्री र उत्पादन लाइसेन्स ३० दिन निलम्बन गर्ने डीएमभीको मागमा सहमति जनाएका थिए। डीएमभीले निर्णय समर्थन गरे पनि तुरुन्त लागू नगरी टेस्लालाई ६० दिनको समय दिएको थियो।
डीएमभीले आफ्नो वेबसाइटमा जारी वक्तव्यमा भनेको छ, “टेस्लाले सुधारात्मक कदम चालेको छ र क्यालिफोर्नियामा आफ्ना विद्युतीय सवारीको मार्केटिङमा ‘अटोपाइलट’ शब्द प्रयोग गर्न बन्द गरेको छ।
यसअघि नै ‘फुल सेल्फ-ड्राइभिङ’ शब्द प्रयोग गर्दा चालक निगरानी आवश्यक हुने स्पष्ट पारिएको थियो। यी कदमका कारण टेस्लाको डिलर र उत्पादक लाइसेन्स ३० दिनका लागि निलम्बन हुने छैन।”
टेस्लाले केवल अटोपाइलट शब्द हटाएको मात्र होइन। जनवरीमा कम्पनीले अमेरिका र क्यानडामा अटोपाइलट सेवा नै बन्द गरेको थियो। यसले डीएमभीसँगको अनुपालनमा मद्दत गर्नुका साथै, अतिरिक्त शुल्क तिरेर लिनुपर्ने एफएसडी प्रणालीको प्रयोग बढाउने रणनीतिक कदमका रूपमा पनि हेरिएको छ।
फेब्रुअरी १४ सम्म एकपटकको ८,००० डलर शुल्कमा उपलब्ध रहेको एफएसडी सुपरभाइज्ड अब मासिक ९९ डलर सदस्यतामार्फत मात्र उपलब्ध छ। कम्पनीका सीईओ इलन मस्कले प्रणाली थप सक्षम बन्दै जाँदा सदस्यता शुल्क बढ्न सक्ने संकेत दिएका छन्।
प्रकाशित: ६ फाल्गुन २०८२, बुधबार
