एण्ड्रोइड १६ मा आयो नयाँ सुरक्षा फिचर, हानीकारक नेटवर्कको प्रयोगबाट बचाउने

काठमाडौं ।

स्मार्टफोनलाई पनि हाल ह्याकरहरुले ट्र्याक गरिरहेका हुन सक्छन्। तर सामान्य प्रयोगकर्तालाई यो थाहा नहुन सक्छ वा थाहा भएर पनि सामान्य कमजोरी भन्दै नजरअन्दाज गरिएको हुनसक्छ।

यो समस्यालाई सम्बोधन गर्न गुगलले एन्ड्रोइड १६ मा एउटा नयाँ सुरक्षा फिचर ल्याउँदैछ, जसले तपाईंको मोबाइल फोनले नक्कली वा असुरक्षित नेटवर्क प्रयोग गरिरहेको छ भने वा त्यस्तो नेटवर्कले तपाईंको डिभाइससँग सम्बन्धित पहिचान विवरण मागिरहेको छ भने चेतावनी दिनेछ।

तर यो फिचर हालकै एन्ड्रोइड डिभाइसहरूमा उपलब्ध नहुन सक्छ किनकि अहिलेका उपकरणहरूमा आवश्यक हार्डवेयर सपोर्ट छैन। एन्ड्रोइड अथोरिटीको प्रारम्भिक रिपोर्ट अनुसार, यो प्रविधिसँग पहिलो पटक सुसज्जित हुने सम्भावित फोन पिक्सेल १० हुनसक्छ जुन यो ग्रीष्म ऋतुमा सार्वजनिक हुने अपेक्षा गरिएको छ।

रोयटर्सका अनुसार यो फिचर ‘सेल साइट सिमुलेटर’ विरुद्ध सुरक्षा दिनका लागि डिजाइन गरिएको हो। यी उपकरणहरू मोबाइल टावर जस्तो देखिन्छन् र नजिकैका फोनहरूलाई जालमा पारेर जडान गराउँछन्। एकपटक जडान भएपछि, ती उपकरणहरूले फोनको स्थानजस्ता संवेदनशील जानकारी प्राप्त गर्न सक्छन्।

‘स्टिङरे’ नामले चिनिने यी सिमुलेटरहरूलाई अमेरिकी आप्रवासन तथा सीमा सुरक्षा निकायहरूले प्रयोग गरेको रिपोर्टहरू सार्वजनिक भएका छन्।

नयाँ सुरक्षा फिचरहरू यस महिनाको सुरुमा जारी गरिएको पछिल्लो एन्ड्रोइड अपडेटको हिस्सा हुन्। यस्ता फिचर भएको उपकरणमा “नेटवर्क नोटिफिकेसन” अन/अफ गर्ने विकल्प हुनेछ, जसले तपाईंको फोन असुरक्षित नेटवर्कमा जडान भएमा वा नेटवर्कले तपाईंको फोनको युनिक आइडेन्टिफायर मागेमा चेतावनी दिनेछ। साथै, “टुजी नेटवर्क सुरक्षा” अन गर्न सकिने अर्को विकल्प पनि हुनेछ, जसले कमजोर नेटवर्क प्रणालीबाट जोगाउने उल्लेख गरिएको छ।