गुगलले आफ्नो एआई च्याटबट जेमिनी सुधार गर्न एन्थ्रोपिकको क्लाउड प्रयोग गरिरहेको खुलासा

काठमाडौं ।

गुगलले प्रतिद्वन्द्वी कम्पनी एन्थ्रोपिकको एआई मोडल क्लाउडलाई आफ्नो एआई च्याटबट जेमिनि सुधार गर्न प्रयोग गरिरहेको छ। एआई क्षेत्रमा कम्पनीहरूले आफ्नो मोडललाई प्रतिस्पर्धी मोडलसँग तुलना गर्दै सुधार गर्ने सामान्य प्रक्रिया अपनाउँछन्।

गुगलले जेमिनिको जवाफहरूको मूल्याङ्कन गर्न ठेकेदारहरूलाई प्रयोग गरिरहेको छ, जहाँ जवाफको सत्यता र पुनरावृत्ति जस्ता मापदण्डहरूमा स्कोर दिइन्छ।

ठेकेदारहरूले बताएअनुसार उनीहरूलाई प्रत्येक प्रश्नमा जेमिनि वा क्लाउड को जवाफ राम्रो छ भनी निर्णय गर्न ३० मिनेटसम्म समय दिइन्छ। साथै, उनीहरूले गुगलको आन्तरिक प्लेटफर्ममा क्लाउड को नाम देख्न थालेका छन् जसले जेमिनि लाई अन्य मोडलहरूसँग तुलना गर्न प्रयोग गरिन्छ। केही जवाफहरूमा त “आई एम क्लाउड क्रियटेड बाइ एन्थ्रोपिक” भनेर स्पष्ट लेखिएको पनि पाइएको टेकक्रञ्चले उल्लेख गरेको छ।

गुगलका आन्तरिक कुराकानीमा ठेकेदारहरूले क्लाउडको जवाफ जेमिनिको भन्दा सुरक्षित भएको पत्ता लगाए। क्लाउडले असुरक्षित ठानिएका प्रश्नहरूमा जवाफ दिन अस्वीकार गर्दा जेमिनिले केही आपत्तिजनक सामग्री, जस्तै “नग्नता र बन्धन” सम्बन्धी जवाफ दिएको देखियो।

एन्थ्रोपिकको सेवा सर्तमा स्पष्ट रूपमा क्लाउडलाई अनुमति नलिँदासम्म प्रतिस्पर्धी उत्पादन निर्माण गर्न वा प्रशिक्षित गर्न प्रयोग गर्न रोक लगाइएको छ। तर गुगल एन्थ्रोपिक को ठूलो लगानीकर्ता भएकाले यसबारे अनुमति लिएको वा नलिएको स्पष्ट छैन।

गुगल डीपमाइण्डका प्रवक्ता शिरा म्याकनामाराले टेकक्रञ्चलाई बताए अनुसार गुगलले विभिन्न एआई मोडलको जवाफहरू तुलना गर्छ। तर उनले क्लाउडलाई जेमिनि प्रशिक्षणका लागि प्रयोग गरिएको दावी अस्वीकार गर्दै भनिन्, “जेमिनिलाई क्लाउडको मोडल प्रयोग गरेर प्रशिक्षण गरिएको दावी गलत हो।”