गुगलकी पूर्व कार्यकारी सुजन वोइचिस्कीको ५६ वर्षको उमेरमा निधन

काठमाडौं ।

गुगल र युट्युबलाई आजको अवस्थासम्म ल्याइपुर्याउन लामो समय योगदान दिएकी सुसान वोजिस्कीको ५६ वर्षको उमेरमा निधन भएको छ।

वोजिस्कीले गुगलको निर्माणमा महत्वपूर्ण भूमिका खेल्नुका साथै ९ वर्षसम्म युट्युबको प्रमुख कार्यकारी अधिकृतको रूपमा सेवा गरेकी अन्तरराष्ट्रिय समाचार संस्था एपीन्युजले जनाएको छ । उनले गत वर्ष आफ्नो “परिवार, स्वास्थ्य, र व्यक्तिगत परियोजनाहरूमा ध्यान केन्द्रित गर्न” भन्दै पदबाट राजीनामा दिएकी थिइन्।

प्रविधि उद्योगमा पुरुषहरूको प्रभुत्व रहेको क्षेत्रमा उनी सबैभन्दा सम्मानित महिला कार्यकारीहरूमध्ये एक थिइन्। गुगलका संस्थापकहरू ल्यारी पेज र सेर्गेई ब्रिनसँगको उनको सहकार्य १९९८ मा सुरु भएको थियो। उनीहरूले यही सहकार्यका आधारमा आफ्नो खोज इन्जिनलाई व्यापारमा परिणत गरे।

वोजिस्कीले आफ्नो मेन्लो पार्क, क्यालिफोर्नियाको घरको ग्यारेज उनीहरूलाई मासिक १ हजार ७ सय डलरमा भाडामा दिइन्, जसले एउटा महत्वपूर्ण साझेदारीलाई बलियो बनायो।

त्यस समयमा २५ वर्षका पेज र ब्रिनले पाँच महिनासम्म वोजिस्कीको ग्यारेजमा आफ्नो खोज इन्जिनलाई परिष्कृत गर्न जारी राखे । समाचारका अनुसार त्यसपछि गुगललाई औपचारिक कार्यालयमा सारियो र पछि तिनीहरूले आफ्नी पूर्व-मालिक वोजिस्कीलाई उनीहरूको कम्पनीमा काम गर्न मनाए।