न्युरालिंकले दोस्रो व्यक्तिको दिमागमा पनि जडान गर्यो ‘चिप’, कत्तिको प्रभावकारी होला?

काठमाडौं ।

स्पेसएक्सका मालिक इलन मस्कको स्टार्टअप कम्पनी न्युरालिंकले दोस्रो व्यक्तिको दिमागमा पनि सफलतापूर्वक चिप जडान गरेको छ। उक्त चिप पक्षघात भएका व्यक्तिलाई सोचेरै डिजिटल डिभाइसहरु चलाउन सहज होस् भन्ने हेतुले डिजाइन गरेको यस स्टार्टअपका मालिक इलन मस्कलाई उद्धृत गर्दै समाचार संस्था रोयटर्सले लेखेको छ।

न्युरालिंक हाल आफूले मेरुदण्ड अर्थात् स्पाइनल कर्डमा चोट लागेका व्यक्तिहरुलाई सहयोग गर्नका लागि बनाइएको उक्त चिपको परीक्षणको क्रममा रहेको छ। यसअघिका पहिलो व्यक्तिले उक्त चिपका माध्यमबाट भिडियो गेम खेल्न, इन्टरनेट ब्राउज गर्न, सामाजिक सञ्जालमा पोस्ट गर्न तथा ल्यापटपमा कर्सर चलाउन सकेका थिए।

गत शुक्रबार अबेर रिलिज गरिएको लगभग ८ घण्टा लामो पडकास्टमा मस्कले चिप जडान गरिएका दोस्रो व्यक्तिका बारेमा पनि छोटो विवरण पेश गरेका थिए । डाइभिङ गर्ने क्रममा दुर्घटनामा परेर पक्षघात भएका ती व्यक्तिमा पहिलो व्यक्तिमा झैं मेरुदण्डमा चोट लागेको थियो वा थिएन भन्ने मस्कले प्रस्ट रुपमा खुलाएनन्।

रोयटर्सका अनुसार मस्कले दोस्रो व्यक्तिको दिमागमा राखिएकोमध्ये ४ सय इलेक्ट्रोडले काम गरिरहेको बताएका छन्। आफ्नो वेबसाइटमा जानकारी राख्दै उनले ती व्यक्तको दिमागमा जम्मा १०२४ ओटा इलेक्ट्रोडहरु जडान गरिएको बताए।

‘हाम्रो यो दोस्रो प्रत्यारोपण एकदम राम्रो भएको छ, मस्कले लेक्सफ्रिडम्यानसँगको पडकास्टमा भने, ‘त्यहाँबाट थुप्रै सिग्नल आइरहेको छ, थुप्रै इलेक्ट्रोडहरुले काम गरिरहेका छन्।समग्रमा यसले राम्रो काम गरिरहेको छ।’