अल्फाबेटले दोस्रो त्रैमासमा कमायो साढे ८४ अर्ब डलर, अघिल्लो वर्षको तुलनामा १४ प्रतिशतले बढी

काठमाडौं ।

गुगलको मूल कम्पनी अल्फाबेटले दोस्रो त्रैमासमा ८४ अर्ब ७२ करोड डलर राजश्व आम्दानी गरेको छ ।

यो आँकडा सन् २०२४ को दोस्रो त्रैमास अर्थात् गत अप्रिलदेखि जुन अन्तिमसम्मको हो । तुलनात्मक हिसाबले हेर्दा कम्पनीको आम्दानी गत वर्षको सोही अवधिको तुलनामा १४ प्रतिशतले बढेको छ ।

नाइनटूफाइभ गुगलका अनुसार गत वर्षको सोही अवधिमा कम्पनीले ७४ अर्ब ६० करोड डलर आर्जन गरेको थियो ।

यस वर्षको दोस्रो त्रैमासमा सञ्चालन मुनाफा २७ अर्ब ४३ करोड डलर भएको थियो भने यो आँकडा अघिल्लो वर्षको सोही अवधिमा १८ अर्ब ३७ करोड डलरमात्र रहेको थियो । यस वर्षको दोस्रो त्रैमासमा कम्पनीको खुद नाफा २३ अर्ब ६२ करोड डलर रहेको छ ।

समग्रमा तुलना गर्दा अल्फाबेटले यस वर्षको दोस्रो त्रैमासमा राजश्वस्वरुप ८० अर्ब ५० करोड तथा खुद नाफाका रुपमा २३ अर्ब ६६ करोड डलर संकलन गरेको छ ।

यो अवधिमा संकलित राजश्वमध्ये ८ अर्ब ६६ करोड युट्युब विज्ञापन तथा क्लाउडको आम्दानीको हिस्सा १० अर्ब ३५ करोड डलर रहेको प्रतिवेदनमा उल्लेख छ । यो आँकडा गत वर्ष क्रमश: ७ अर्ब ६७ करोड तथा ८ अर्ब ३ करोड मात्र रहेको थियो ।

हार्डवयर, प्लेस्टोर तथा युट्युबका विज्ञापनबाहेकका आम्दानी समाहित यसअघि गुगल अदर शीर्षकमा राखिएका गुगल सब्स्क्रिप्शन, प्लेटफर्म तथा डिभाइसहरुमार्फत् कमुपनीले ९ अर्ब ३१ करोड कमाएको छ । यो रकम गत वर्षको सोही अवधिको ८ अर्ब १४ करोडको तुलनामा बढी हो ।

अदर बेट्स समूहमा रहेका गुगल फाइबर तथा ब्रोडब्याण्ड व्यवसायमा भने पहिले झैं घाटा ब्यहोर्नुपरेको छ । गत वर्षको दोस्रो त्रैमासमा ८१ करोड ३० लाख घाटा भएकोमा यो बढेर यस वर्षको सोही अवधिमा १ अर्ब १२ करोड पुगेको बताइएको छ।