भारतमा गुगलमाथि एप विकासकर्ताबाट बढी कमिसन लिने गरेको आरोप

काठमाडौं ।

ग्लोबल टेक कम्पनी गुगलले भारतीय प्रतिस्पर्धा आयोग (सीसीआई) को आदेश उल्लङ्घन गरेको र वैकल्पिक बिलिङ प्रणाली रोज्ने एप विकासकर्ताहरूबाट ११ देखि २६ प्रतिशतसम्म कमिसन लिएको आरोप लागेको छ।

डिजिटल इन्डिया फाउन्डेशन (एडीआईएफ) को गठबन्धनले सीसीआई लगायतका अधिकारीहरूलाई यस विषयमा हेर्न र गुगलले आदेशको पूर्ण पालना गरेको सुनिश्चित गर्न अनुरोध गरेको भारतीय मिडियाहरुले उल्लेख गरेका छन्।

डिजिटल स्टार्टअपसँग सम्बन्धित नीति थिंक ट्याङ्क एडीआईएफले एक विज्ञप्तिमा भन्यो, “हालसालै गुगलले एप विकासकर्ताहरूको लागि बिलिङको तरिका परिवर्तन गरेको छ। कम्पनीले प्रयोगकर्ताले वैकल्पिक बिलिङ प्रणाली मार्फत भुक्तानी गरेमा गुगल प्लेको सेवा शुल्क चार प्रतिशतले घटाइने बताएको छ। यसले एप विकासकर्ताहरूलाई गुगलको सेवा प्रयोग नगरे पनि कम्पनीलाई कमिसन तिर्न बाध्य पार्छ।”

एडीआईएफले गुगलले सीसीआईको आदेशलाई पूर्ण रूपमा उल्लङ्घन गरिरहेको बताएको छ।

विज्ञप्तिमा थप भनिएको छ, “यो कानुन अन्तर्गतको आफ्नो दायित्वबाट जोगिन गुगलको अर्को प्रयास हो। कम्पनीको दावी छ कि यी परिवर्तनहरू नियामक आवश्यकता अनुसार गरिएको हो। तर, यो सीसीआईको आदेशको पालना समाधानहरूको पूर्ण उल्लंघन हो।”

सीसीआईले कम्पनीलाई एप विकासकर्ताहरूलाई अनुचित वा भेदभावपूर्ण हुने कुनै पनि शर्त नरोक्न निर्देशन दिएको थियो। प्रयोगकर्ताले तेस्रो पक्षको प्रशोधन सेवा प्रयोग गरेपनि कम्पनीले ११ देखि २६ प्रतिशतसम्म कमिशन किन लिइरहेको छ भन्ने कुनै कारण दिइएको छैन।

भारतमा ६० करोड स्मार्टफोनमध्ये ९७ प्रतिशत एन्ड्रोइडमा चल्छन्। युरोपमा, यो संख्या लगभग ५५० मिलियन स्मार्टफोनहरूको लागि ७५ प्रतिशत हो। एन्ड्रोइड बजारमा आफ्नो प्रभुत्वको दुरुपयोग गरेको भन्दै गत वर्ष अक्टोबरमा सीसीआईले गुगल चलाउने अमेरिकी कम्पनी अल्फाबेटलाई करिब १६ करोड १० लाख डलर जरिवाना गरेको थियो ।