एलेक्सा विभागको नेतृत्वमा फेरबदल गर्दै अमेजन

काठमाडौं ।

अमेजनले आफ्नो एलेक्सा विभागको नेतृत्वमा फेरबदल गर्ने शुक्रबार पुष्टि गरेको छ। कम्पनीले एलेक्सा भ्वाइस असिस्टेन्ट समावेश गरिएका आफ्ना पहिलो ट्याब्लेट कम्प्युटर सार्वजनिक गरेको एक दिनपछि यो घोषणा गरेको हो।

अमेजनका अनुसार तीन वर्षभन्दा बढी समयदेखि एलेक्सा र इकोका उपाध्यक्षका रूपमा काम गर्दै आएका ड्यानियल राउशले आगामी महिना यो विभागको जिम्मेवारी छाड्नेछन्। उनी अमेजनमा १७ वर्षदेखि कार्यरत छन्।

रोयटर्सका अनुसार कार्यक्रम तथा विश्वव्यापी उत्पादन सार्वजनिक गर्ने अवसरमा एलेक्साको प्रतिनिधिका रूपमा देखिँदै आएका राउश सन् २०२७ मा डिभाइस तथा सर्भिसेस विभागमा अर्को भूमिकामा फर्कनेछन्।

उनको स्थानमा अमेजनले हाल फायर टीभी, विज्ञापन र अमेजन एपस्टोरका उपाध्यक्षका रूपमा कार्यरत एडन मार्कसलाई नियुक्त गर्नेछ। मार्कस सन् २०२५ को सुरुवातमा माइक्रोसफ्टबाट अमेजनमा आएका थिए। उनले गत महिना नयाँ फायर टीभी स्टिक सार्वजनिक गर्ने कामको नेतृत्व गरेका थिए। उक्त उपकरणले मिश्रित प्रतिक्रिया पाएको छ।

अमेजनका अनुसार उत्पादन तथा मार्केटिङका उपाध्यक्ष केभिन किथले आफ्नो वर्तमान जिम्मेवारी कायम राख्दै केही समयका लागि मार्कसका जिम्मेवारीसमेत सम्हाल्नेछन्। कम्पनीले नेतृत्व परिवर्तनबारे थप विवरण दिन अस्वीकार गरेको छ।

सन् २०१४ मा सार्वजनिक भएदेखि नै एलेक्सा अमेजनका लागि निरन्तर घाटाको व्यवसाय बनेको छ।

अमेजनले लामो समयदेखि प्रयोगकर्ताका विस्तृत निर्देशनको जवाफ दिन सक्ने जेनेरेटिभ एआईमा आधारित एलेक्साको नयाँ संस्करण विकास गरिरहेको थियो। बिहीबार सार्वजनिक गरिएका नयाँ एलेक्सा ट्याब्लेटमा यो सेवा समावेश गरिएको छ।

अमेजनले यसअघि कम मूल्यमा उपलब्ध गराउँदै आएका फायर ट्याब्लेटको तुलनामा नयाँ ट्याब्लेटलाई उच्च मूल्यको उत्पादनका रूपमा बजारमा ल्याएको छ।

एलेक्साको पछिल्लो संस्करण ‘एलेक्सा प्लस’ वार्षिक १३९ अमेरिकी डलर शुल्क लाग्ने प्राइम सदस्यतामा समावेश छ। यसलाई छुट्टै सेवा रूपमा प्रयोग गर्न मासिक २० अमेरिकी डलर तिर्नुपर्छ।