काठमाडौं ।
नेपाल चार्टर्ड एकाउन्टेन्ट्स संस्था (आईक्यान) र क्लाउडमा आधारित लेखा प्रणाली ‘टिग’ को विकास तथा सञ्चालन गर्दै आएको बीआईसी टेक्नोलोजी प्राइभेट लिमिटेड (टिग) बीच समझदारीपत्रमा हस्ताक्षर भएको छ।
नेपालको लेखा व्यवसायमा डिजिटल रूपान्तरण तथा प्रविधिको प्रयोगलाई प्रवर्द्धन गर्ने उद्देश्यले सम्झौता गरिएको हो।
समझदारीअनुसार, आईक्यानमा दर्ता भई सदस्यता नवीकरण गरेका योग्य चार्टर्ड एकाउन्टेन्ट (सीए) तथा रजिस्टर्ड अडिटर (आरए) फर्महरूले आईक्यानको आधिकारिक अभिलेखका आधारमा आवश्यक प्रमाणीकरण पश्चात् टिगको बेसिक भर्जन आजीवन निःशुल्क प्रयोग गर्न सक्नेछन्। त्यसैगरी, योग्य आईक्यान विद्यार्थीहरूले शैक्षिक तथा गैर–व्यावसायिक प्रयोजनका लागि टिग को एजुकेशन भर्जन निःशुल्क प्रयोग गर्न सक्नेछन्
कम्पनीका अनुसार, यस सहकार्यअन्तर्गत लेखा व्यवसायी तथा विद्यार्थीहरूको डिजिटल क्षमता अभिवृद्धि, व्यावहारिक सिकाइ, प्रविधिको प्रयोग तथा नवप्रवर्तन प्रवर्द्धन गर्न संयुक्त कार्यक्रम तथा पहलहरू सञ्चालन गरिनेछन्।
समझदारीअनुसार टिगले प्रयोगकर्ताका लागि प्रणालीमा आबद्ध हुन आवश्यक सहयोग, प्रशिक्षण सामग्री, उत्पादनसम्बन्धी मार्गदर्शन तथा ग्राहक सहायता उपलब्ध गराउनेछ भने आईक्यानले योग्य फर्म तथा विद्यार्थीको प्रमाणीकरणमा सहजीकरण गर्नुका साथै आफ्ना आधिकारिक सञ्चार माध्यममार्फत यस पहललाई प्रवर्द्धन गर्नेछ।
यस सहकार्यले नेपालको लेखा व्यवसायलाई डिजिटल रूपमा सक्षम, प्रविधिमैत्री तथा भविष्यका लागि तयार व्यवसायका रूपमा विकास गर्न आईक्यान र टिगको साझा प्रतिबद्धतालाई थप सुदृढ गर्ने विश्वास लिइएको छ।
प्रकाशित: २३ आश्विन २०८३, शुक्रबार
