काठमाडौं ।
अमेरिकी सरकारले आगामी केही स्पेक्ट्रम लिलामीबाट सरकारी कोषमा १०० अर्ब अमेरिकी डलरसम्म थप रकम आउने अपेक्षा गरेको छ। उद्योग क्षेत्रले पनि विशेषगरी ४ गिगाहर्ज ब्यान्डको बिक्री प्रक्रिया अघि बढाउन सरकारलाई दबाब दिइरहेको छ।
अमेरिकी फेडरल कम्युनिकेसन्स कमिसन (एफसीसी) का अध्यक्ष ब्रेन्डन कार देशको स्पेक्ट्रम अवस्थाबारे छलफल गर्न उत्साहित देखिएका छन्। नियामक निकायले चार वर्षपछि पहिलोपटक गत जुनमा एडब्लूएस–३ स्पेक्ट्रम लिलामी पूरा गरेको थियो।
यसै विषयमा उनले यस साता उद्योग संगठन सीटीआईएका अध्यक्ष तथा प्रमुख कार्यकारी अधिकृत र पूर्व एफसीसी अध्यक्ष अजित पाईसँग वायरलेस पोलिसी फोरममा छलफल गरेका थिए।
“सी–ब्यान्ड आगामी गर्मीयाममा हुन सक्छ… त्यसपछि थप तीनवटा लिलामी गर्न हामी राम्रो अवस्थामा हुनेछौँ… हामी ७ गिगाहर्ज, १.६ गिगाहर्ज र २.७ गिगाहर्ज हेरिरहेका छौँ,” सीटीआईएले एक्समा राखेको पोस्टअनुसार कारले पाईसँग भनेका छन्।
कारले आगामी लिलामीबाट १०० अर्ब डलरभन्दा बढी आम्दानी हुन सक्ने सम्भावनाबारे कुरा गरेको रोयटर्सले जनाएको छ।
यो निकै ठूलो रकम भए पनि लक्ष्य अवास्तविक भने होइन। एडब्लूएस–३ लिलामीबाट ३.५७ अर्ब डलर आम्दानी भएको थियो। आगामी वर्ष अपर सी–ब्यान्डका लागि दशौँ अर्ब डलर खर्च हुन सक्ने चर्चा भइरहेको छ।
यसअघि सन् २०२१ को सुरुवातमा सम्पन्न लोअर सी–ब्यान्डको लिलामीमा ९४ अर्ब डलरको बोलकबोल भएको थियो। त्यतिबेला भेरिजोनले प्रोत्साहन भुक्तानी र स्पेक्ट्रम खाली गराउने लागतसहित ५२.९ अर्ब डलर खर्च गरेको थियो।
रोयटर्सका अनुसार कारले आगामी चरणका लिलामीले बजारमा नयाँ प्रतिस्पर्धी ल्याउन सक्ने विषय पनि उठाएका थिए। यसले स्पेक्ट्रममा स्पेसएक्सको चासो बढ्दै गएको तथ्यलाई संकेत गरेको हुन सक्छ।
त्यसैले यसपटक भेराइजन, एटी एन्ड टी र टी–मोबाइल यूएस नै सबैभन्दा ठूलो खर्च गर्ने कम्पनी नहुन सक्छन्। तर यस विषयमा आगामी वर्षभरि बहस जारी रहनेछ। एफसीसीले हालै १६० मेगाहर्ज सी–ब्यान्ड फ्रिक्वेन्सी बिक्रीका लागि नियममा मतदान गरेको छ र सन् २०२७ को जुलाईसम्म लिलामी गरिसक्नुपर्नेछ।
“हामी सी–ब्यान्डबारे निकै उत्साहित छौँ,” सीटीआईएले कारलाई उद्धृत गर्दै भनेको छ। “त्यसपछि हामी पूर्ण गतिमा अघि बढ्नेछौँ।”
सीटीआईएले खोजिरहेको दृष्टिकोण पनि यही हो। एफसीसीले माथि उल्लेख गरिएका फ्रिक्वेन्सी ब्यान्डका लागि योजना सार्वजनिक गरिसकेको भए पनि उद्योग संगठनले कारले उल्लेख नगरेको ४ गिगाहर्ज ब्यान्डको प्रक्रिया पनि अघि बढाउन आग्रह गरेको छ।
टेलिकम्स डटकमका अनुसार सीटीआईएले उक्त कार्यक्रममा ४ गिगाहर्ज ब्यान्ड अमेरिका वायरलेस र कृत्रिम बुद्धिमता दुवै क्षेत्रमा विश्व नेतृत्व हासिल गर्ने लक्ष्यका लागि महत्वपूर्ण हुने आफ्नो धारणा दोहोर्याएको छ। यस विषयमा उसले ‘अमेरिकाको आर्थिक तथा राष्ट्रिय सुरक्षाका लागि ४ गिगाहर्ज ब्यान्डको उपयोग’ शीर्षकमा नयाँ प्रतिवेदन पनि सार्वजनिक गरेको छ।
प्रतिवेदनमा ४ गिगाहर्ज स्पेक्ट्रम ब्यान्डका फाइदाबारे उल्लेख गरिएको छ। यो कभरेज र क्षमता दुवैका लागि उपयुक्त मिड-ब्यान्ड फ्रिक्वेन्सी हो। यसमा ठूलो निरन्तर च्यानल उपलब्ध छन् र व्यावसायिक प्रयोगका लागि आवश्यक पूर्वाधार पनि स्थापित भइसकेको छ। तर ४ गिगाहर्जका विषयमा समय निकै महत्वपूर्ण रहेको सीटीआईएको मुख्य चिन्ता छ। उसको चिन्ता चीन अगाडि बढ्न सक्ने विषयमा छ।
प्रतिवेदनमा भनिएको छ, “अमेरिकासँग ६जी र एआई पूर्वाधारमा नेतृत्व कायम गर्न घरेलु र विश्वव्यापी दुवै रूपमा समयको सानो अवसर छ।”
नेसनल टेलिकम्युनिकेसन्स एन्ड इन्फर्मेसन एडमिनिस्ट्रेसन (एनटीआईए) ले गत जुलाईमा ४.४ गिगाहर्ज ब्यान्डको अध्ययन गर्ने योजना स्वीकृत गरेको थियो। प्रतिवेदनले एनटीआईएलाई प्रारम्भिक कामलाई अघि बढाउँदै यसै शरद ऋतुमा ४ गिगाहर्ज ब्यान्डको औपचारिक अध्ययन सुरु गर्न र स्पष्ट लक्ष्य निर्धारण गर्न आग्रह गरेको छ। ती लक्ष्यमा सन् २०२८ सम्म स्पेक्ट्रम पहिचान र सन् २०३० सम्म एफसीसीबाट लिलामी गर्ने विषय समावेश छन्।
यसबाट अमेरिकी सरकारले सरकारी प्रयोगकर्तालाई उनीहरूको सञ्चालनको मूल्यांकन गर्न पर्याप्त समय र स्रोत दिन सक्ने तथा आफ्ना सहयोगी देश र उपकरण निर्मातालाई ४ गिगाहर्जलाई भविष्यका योजनामा समावेश गर्न आवश्यक निश्चितता उपलब्ध गराउन सक्ने प्रतिवेदनमा उल्लेख छ।
यसका विस्तृत विवरण र समयसीमा अझै तय हुन बाँकी छन्। तर कुनै न कुनै रूपमा आगामी केही वर्षमा अमेरिकामा धेरै स्पेक्ट्रम लिलामी हुनेछन्। यस प्रक्रियाबाट अमेरिकी सरकारले ठूलो रकम आम्दानी गर्ने सम्भावना पनि छ।
प्रकाशित: २ आश्विन २०८३, शुक्रबार
