रुसले लामो समयदेखि रोकिएको फाइभजी सेवा सुरु गर्यो, तर आईफोन प्रयोगकर्ताले प्रयोग गर्न नपाउने

काठमाडौं ।

रुसले शुक्रबार लामो समयदेखि रोकिएको आफ्नो फाइभजी मोबाइल नेटवर्क सञ्चालनमा ल्याउने घोषणा गर्यो; तर एप्पलले मस्कोसँग यससम्बन्धी समन्वय नगरेसम्म आईफोन प्रयोगकर्ताहरूले यो सेवा प्रयोग गर्न पाउने छैनन्।

रुसी सञ्चारमाध्यमका अनुसार, रुसी सरकारले सन् २०१९ मा नै ५जी इन्टरनेटसम्बन्धी योजना घोषणा गरेको थियो। तर, सैन्य तथा सुरक्षा निकायहरूले प्रयोग गर्ने फ्रिक्वेन्सीसँग यसको अवरोध (ओभरल्याप) हुन सक्ने चिन्ताका कारण रुसको शक्तिशाली सुरक्षा परिषद्ले उक्त कदमलाई रोकेको थियो।

युक्रेनी ड्रोनहरूलाई रोक्नका लागि बारम्बार इन्टरनेट सेवा बन्द गरिँदा रुसमा व्यापक असन्तुष्टि बढिरहेको बेला यो सेवा सुरु हुन लागेको हो। अधिकारीहरूका अनुसार, ती ड्रोनहरूले दिशा पत्ता लगाउन मोबाइल इन्टरनेटको प्रयोग गर्ने गर्छन्।

“१६ वटा सहरमा ५जी सेवा सुरु भइसकेको छ, जसले करिब १ करोड मानिसलाई उच्च गतिको पाँचौं पुस्ताको मोबाइल इन्टरनेटको पहुँच प्रदान गरेको छ,” रुसको डिजिटल मन्त्रालयले एक विज्ञप्तिमा जनाएको एएफपीले रिपोर्ट गरेको छ।

तर आईफोनमा लगाइएको प्रतिबन्धको अर्थ करोडौं रुसीहरू अर्थात् हरेक चारमध्ये एक मोबाइल प्रयोगकर्ता सम्भवतः यो प्रविधिबाट वञ्चित हुनेछन्। सन् २०२२ मा मस्कोले युक्रेनमाथि आक्रमण गरेपछि एप्पलले रुसी बजारबाट आफ्नो कारोबार बन्द गरेको थियो।

रुसमा आधारित ब्लग ‘एप्पलइन्साइडर डट आरयु’ (AppleInsider.Ru) का अनुसार, नयाँ आईफोन मोडेलहरू ५जी नेटवर्कमा जोडिन सक्ने भए तापनि यो सेवा सञ्चालन गर्न अमेरिकी प्रविधि कम्पनीले रुसी मोबाइल सेवा प्रदायकहरूसँग सहकार्य गर्नुपर्ने हुन्छ।

एप्पलले यस्तो कदमका लागि अनुमति दिन्छ वा दिँदैन भन्ने कुरा स्पष्ट छैन।

“निकट भविष्यमै, यी सहरहरूमा एन्ड्रोइडमा आधारित डिभाइस प्रयोग गर्नेहरूले यी सेवाहरू प्रयोग गर्न पाउनेछन्। आईफोन प्रयोगकर्ताहरूका लागि ५जी सेवाको उपलब्धता एप्पलको निर्णयमा निर्भर गर्दछ,” डिजिटल मन्त्रालयले थप्यो।

मेगाफोनले अप्रिलमा जनाएअनुसार, सन् २०२६ को सुरुमा मेगाफोन मोबाइल नेटवर्कका ग्राहकहरूमध्ये करिब २४ प्रतिशत आईफोन प्रयोगकर्ता थिए।