आईफोन र म्याकबुकमा चीनको सीएक्सएमटीका मेमोरी चिप परीक्षण गर्दै एप्पल

काठमाडौं ।

एप्पलले एआईको बढ्दो प्रयोगका कारण उत्पन्न कम्पोनेन्ट अभाव कम गर्न आईफोन र म्याकबुकसहित विभिन्न उत्पादनमा चीनको सीएक्सएमटीका मेमोरी चिप परीक्षण गरिरहेको वाल स्ट्रिट जर्नलले आइतबार जनाएको छ।

रिपोर्टका अनुसार चीनको बजार मूल्यका आधारमा सबैभन्दा ठूलो चिप निर्माता सीएक्सएमटीसँग एप्पलले प्रारम्भिक चरणमा कम्पोनेन्ट आपूर्तिबारे छलफल गरेको थियो। चीनमा बिक्री हुने केही उपकरणमा ती चिप प्रयोग गर्ने उद्देश्यले छलफल भएको विषयसँग परिचित व्यक्तिहरूलाई उद्धृत गर्दै रिपोर्टमा उल्लेख गरिएको छ।

तत्कालै उक्त रिपोर्टको पुष्टि गर्न नसकिएको रोयटर्सले उल्लेख गरेको छ। एप्पल र सीएक्सएमटीले रोयटर्सले प्रतिक्रियाका लागि गरेको अनुरोधको जवाफ दिएनन्।

रोयटर्सले यसअघि सीएक्सएमटीले उत्पादन बढाउन बेइजिङमा दोस्रो मेमोरी चिप कारखाना निर्माण गर्नेबारे विचार गरिरहेको र त्यसका लागि लगानी स्रोतसँग छलफल गरिरहेको समाचार सार्वजनिक गरेको थियो।

ल्यापटप निर्माता एचपी र एसरले पनि आपूर्ति अभाव कम गर्न अमेरिकाबाहेक अन्य बजारमा बिक्री हुने आफ्ना उपकरणमा सीएक्सएमटीका मेमोरी चिप प्रयोग गर्न थालेका छन्, वाल स्ट्रिट जर्नलले जनाएको छ।