काठमाडौं ।
सञ्चार तथा सूचना प्रविधिमन्त्री बिक्रम तिमिल्सिनाको निर्देशनपछि नेपाल टेलिकमले आफ्नो प्रिपेड सेवाअन्तर्गतका २८ दिन अवधिका प्याकेजलाई बढाएर ३० दिन बनाउने व्यवस्था कार्यान्वयनमा ल्याएको छ।
कम्पनीका अनुसार ‘कम्बो–२९९ प्याक’ को समयावधि मंगलबार रातिदेखि नै २८ दिनबाट बढाएर ३० दिन कायम गरिएको छ।
यो निर्णय सञ्चार तथा सूचना प्रविधिमन्त्री बिक्रम तिमिल्सिना र नेपाल टेलिकमबीच भएको छलफलपछि तत्काल कार्यान्वयनमा आएको हो।
नेपाल टेलिकमकी निमित्त प्रबन्ध निर्देशक रीना डंगोलका अनुसार हाल एउटा २८ दिने प्याकेजलाई ३० दिनमा रूपान्तरण गरिसकिएको र कम्पनीले आगामी वैशाख ११ गतेसम्म यो अवधिका सबै प्याकेजलाई ३० दिनमा रूपान्तरण गरिसक्ने छ।
यसै सम्बन्धमा नेपाल टेलिकमका सहायक प्रवक्ता नविनकुमार मिश्रले टेक्नोलोजीखबरलाई दिएको जानकारी अनुसार यो सेवा पोस्टपेड ग्राहकहरुका लागि पहिलेदेखि नै चलिरहेको छ भने हाल आएर प्रिपेड ग्राहकका लागि पनि लागू गरिएको हो।
यस व्यवस्थाबाट टेलिकमका ग्राहकलाई प्रत्यक्ष रूपमा लाभ पुग्ने अपेक्षा गरिएको छ। यो अवस्था लागू भएसँगै अब महिनामा एकपटक रिचार्ज गर्दा पुग्ने भएकाले प्रयोगलाई सहज बनाउनेछ। साथै उही मूल्यमा दुई दिन बढी सेवा पाउने भएकाले ग्राहकले डाटा, भ्वाइस तथा एसएमएस प्रयोगमा अतिरिक्त सुविधा प्राप्त गर्नेछन्। यसले खर्च व्यवस्थापनलाई पनि सहज बनाउने र उपभोक्ता सन्तुष्टि बढाउने विश्वास गरिएको छ।
टेलिकमको यस्तो सेवालाई उपभोक्तामैत्री सुधारका रूपमा लिइएको छ भने यसले टेलिकम क्षेत्रमा प्रतिस्पर्धात्मक वातावरणलाई समेत थप गतिशील बनाउने अपेक्षा गरिएको छ।
प्रकाशित: २५ चैत्र २०८२, बुधबार
