काठमाडौं ।
सोसल मिडिया तथा प्रविधि कम्पनी मेटाले चिनियाँ मूलको कृत्रिम बुद्धिमत्ता (एआई) स्टार्टअप म्यानसलाई अधिग्रहण गर्ने भएको जनाएको छ। मेटाले सोमबार यो निर्णय सार्वजनिक गर्दै आफ्ना विभिन्न प्लेटफर्ममा उन्नत एआई प्रविधि एकीकृत गर्ने प्रयासलाई तीव्र बनाएको बताएको छ।
म्यानससँगको सम्झौताका वित्तीय सर्त सार्वजनिक गरिएको छैन। तर यस विषयमा प्रत्यक्ष जानकारी भएको स्रोतका अनुसार सिंगापुरमा आधारित म्यानसको मूल्याङ्कन करिब २ अर्बदेखि ३ अर्ब अमेरिकी डलर बीच गरिएको छ।
यस वर्षको सुरुआतमा म्यानस सामाजिक सञ्जाल एक्स (पहिले ट्विटर) मा चर्चामा आएको थियो। कम्पनीले आफूले संसारकै पहिलो “सामान्य एआई एजेन्ट” सार्वजनिक गरेको दाबी गरेको थियो, जुन कम निर्देशनमै स्वतन्त्र रूपमा निर्णय लिन र कार्य सम्पन्न गर्न सक्षम रहेको बताइएको छ। यस कारण म्यानसलाई एक समय “चीनको अर्को डीपसिक” का रूपमा समेत हेरिएको थियो।
रोयटर्सका अनुसार बेइजिङले पनि म्यानसलाई समर्थन गर्ने चासो देखाएको छ। म्यानसका अनुसार उसका एआई एजेन्टको कार्यक्षमता ओपनएआईको ‘डीप रिसर्च’ भन्दा उच्च रहेको छ।
कम्पनीले चिनियाँ प्रविधि समूह अलिबाबासँग पनि एआई मोडेल विकासका लागि रणनीतिक साझेदारी गरेको छ। मेटाले म्यानसको सेवा सञ्चालन तथा बिक्री गर्ने र यसलाई आफ्ना उपभोक्ता तथा व्यावसायिक उत्पादनहरू—जसमा मेटा एआई पनि समावेश छ—मा एकीकृत गर्ने जनाएको छ।
हालका वर्षहरूमा मेटाजस्ता ठूला प्रविधि कम्पनीहरूले कडा प्रतिस्पर्धाका बीच एआई क्षेत्रमा लगानी बढाउँदै आएका छन्। यसै क्रममा मेटाले यस वर्षको सुरुआतमा डेटा लेबलिङ कम्पनी स्केल एआई मा लगानी गर्दै उक्त स्टार्टअपको मूल्याङ्कन २९ अर्ब डलर पुर्याएको थियो। सो सम्झौतासँगै स्केल एआईका २८ वर्षीय प्रमुख कार्यकारी अधिकृत अलेक्जान्डर वाङ पनि मेटासँग आबद्ध भएका थिए।
म्यानसले आफ्नो मूल कम्पनी बेइजिङ बटरफ्लाइ इफेक्ट टेक्नोलोजीको समर्थनमा यसै वर्ष करिब ७५ मिलियन डलर लगानी जुटाउन सफल भएको थियो। सञ्चारमाध्यमका अनुसार सो समयमा कम्पनीको मूल्याङ्कन करिब ५०० मिलियन डलर थियो। उक्त लगानी चरणको नेतृत्व अमेरिकी भेन्चर क्यापिटल फर्म बेन्चमार्कले गरेको थियो।
हालका वर्षहरूमा धेरै चिनियाँ कम्पनीहरूले चीन–अमेरिका भू–राजनीतिक तनावका कारण व्यवसाय प्रभावित हुने जोखिम घटाउन सिंगापुरलाई आफ्नो मुख्य आधार बनाउँदै आएका छन्। म्यानस पनि यही प्रवृत्तिअन्तर्गत सिंगापुरमा दर्ता भएको कम्पनी हो।
प्रकाशित: १६ पुष २०८२, बुधबार
