बोशले अटोमोटिभ बजार कठिन बनेसँगै लागत घटाउन १३,००० जागिर कटौती गर्ने

काठमाडौं ।

अटोमोटिभ उद्योगतर्फ उपकरणको लागि विश्वको सबैभन्दा ठूलो आपूर्तिकर्ता मानिएको जर्मन कम्पनी बोशले सन् २०३० सम्ममा १३,००० जागिर कटौती गर्ने घोषणा गरेको छ।

विश्वव्यापी कार बजारमा माग घट्दैको अवस्थामा उच्च लागत र प्रतिस्पर्धीहरूको दबाब पछि कम्पनीको यो निर्णय आएको टेलिग्राफले रिपोर्ट गरेको छ।

कम्पनीका अनुसार, लागत अन्तर प्रति वर्ष २.५ बिलियन युरो (२.९ बिलियन अमेरिकी डलर) भएको र यसै कारणले गर्दा हस्तक्षेप आवश्यक बनेको उल्लेख गरिएको छ।

कर्मचारी घटाउनुको साथै, बोशले सामग्री र सञ्चालन लागत घटाउने, भवनहरूमा लगानी सीमित गर्ने र आपूर्ति शृङ्खलाहरू सरल बनाउने लक्ष्य राखेको छ।

कटौतीले जर्मनीका धेरै केन्द्रहरूलाई असर गर्नेछ भने विशेष गरी प्रशासन, बिक्री र उत्पादनमा असर गर्ने बताइएको छ जहाँ माग घट्दै जाँदा अत्यधिक क्षमता हुन पुगेको जनाइएको छ।

“यो धेरै पीडादायी छ, तर प्रतिस्पर्धी रहनुको अर्को कुनै उपाय छैन” निर्देशक बोर्डका सदस्य स्टेफन ग्रोशले भने।

कम्पनीले गत वर्ष उत्पन्न भएको ९०.५ बिलियन युरोको तुलनामा सन् २०२५ मा लगभग २ प्रतिशतको आम्दानी वृद्धि हुने अपेक्षा गरेको सीईओ स्टेफन हार्टुङले बताएका छन्। बोशमा हाल विश्वव्यापी रूपमा लगभग ४,१८,००० कर्मचारीहरू कार्यरत रहेको टेलिग्राफले रिपोर्ट गरेको छ।