मोबाइल बैंकिङमार्फत् हुने कारोबार रकममा एकै महिनामा साढे ४ अर्बमाथिको गिरावट

काठमाडौं ।

नेपालमा २०८१ जेठ महिनाभरी मोबाइल मार्फत हुने बैंकिङ कारोबारको सङ्ख्या अघिल्ला महिनाहरुमा झैं बढेको पाइएको छ भने कारोबार रकममा उल्लेख्य गिरावट आएको छ।

नेपाल राष्ट्र बैंकले हालै सार्वजनिक गरेको आर्थिक वर्ष २०८१/२०८२ को एघारौं महिना २०८२ जेठसम्मको मासिक भुक्तानी प्रणाली सूचक अनुसार मोबाइल बैंकिङ कारोबारमा लगातार सातौं महिना बढोत्तरी भएको र रकममा भने ‍६ महिनापछि गिरावट आएको पाइएको हो।

मोबाइल बैंकिङकमार्फत् हुने कारोबार रकममा चैत मसान्तसम्म आइपुग्दा ३ अर्ब ४६ करोड ६९ लाख रुपैयाँले बढेर समग्रमा ४ खर्ब ५० अर्ब ४५ करोड ९० लाख रुपैयाँ पुगेको थियो।

यसैगरी चैत मसान्तबाट वैशाख मसान्तसम्मको एक महिनामा कारोबार सङ्ख्या ११ लाख ७९ हजार ४९८ बढेर समग्रमा ५ करोड ७३ लाख ७१ हजार २१५ पुगेको थियो भने कारोबार रकम पनि चैत मसान्तको ४ खर्ब ५० अर्ब ४५ करोड ३० लाखबाट ६अर्ब ५० करोड बढेर समग्रमा ४ खर्ब ५६ अर्ब ९५ करोड ४० लाख रुपैयाँ पुगेको थियो।

हालै २०८२ वैशाखबाट जेठमा जाँदा भने कारोबार सङ्ख्यामा ४ लाख ६ हजार ६२८ ले वृद्धिभ भएको छ भने कारोबार रकममा भने ४ अर्ब ६६ करोड ७० लाखले घटेको छ।

वैशाखमा मोबाइल बैकिङमार्फत् भएको कारोबार सङ्ख्या ५ करोड ७३ लाख ७१ हजार २१५ रहेकोमा ४ लाख ६ हजार ६२८ ले बढेर जेठ मसान्तसम्म ५ करोड ७७ लाख ७ हजार ८४३ पुगेको छ।

तर कारोबार रकम भने वैशाख मसान्तसम्म ४ खर्ब ५६ अर्ब ९५ करोड ४० लाख रहेकोमा एक महिनामा ४ अर्ब ६६ करोड ७० लाखले घटेर ४ खर्ब ५२ अर्ब २८ करोड ७० लाखमा झरेको प्रतिवेदनले देखाएको छ।