शाओमीले आफ्ना युवा कर्मचारीलाई दिँदैछ नि:शुल्क वाइफाइ, स्मार्ट घर र जिम भएको फ्ल्याट

काठमाडौं ।

चिनियाँ टेक कम्पनी शाओमीले आफ्ना कर्मचारीहरूका लागि नयाँ र अनौठो पहल सुरु गरेको छ। कम्पनीले बेइजिङ र नानजिङमा “शाओमी युथ अपार्टमेन्ट” सुरु गरेको छ, जुन हालै स्नातक गरेकाहरूलाई ध्यानमा राखेर विशेष रूपमा डिजाइन गरिएको हो।

शाओमी समूहका अध्यक्ष लु वेइबिङका अनुसार, लामो आन्तरिक छलफल पछि, यी अपार्टमेन्टहरूको मासिक भाडा १,९९९ चिनियाँ युआन तय गरिएको छ। यस योजनाको उद्देश्य शाओमी क्याम्पस नजिकै किफायती, सुविधाजनक र स्मार्ट होममा आधारित बसोबास प्रदान गर्नु हो।

बेइजिङका यी युवा अपार्टमेन्टहरू चाङपिङ जिल्लाको डिङ्क्सी रोडमा अवस्थित छन्। यो आवास परिसरमा कुल ७ भवनहरू छन्, जसमा कुल २,६५८ फ्ल्याटहरू समावेश छन्। प्रत्येक एकाइ २९ वर्ग मिटरको स्टुडियो अपार्टमेन्ट हो जसमा निजी बाथरूम र शाओमीका स्मार्ट होम डिभाइसहरू पूर्व-स्थापित गरिएका छन्।

अपार्टमेन्टहरू पूर्णरूपमा सुसज्जित छन् र रेडी टू मुभ इन अवस्थामा प्रदान गरिँदै छन्। यसमा सामुहिक भान्छा, जिम, मिडिया रुम र हरित परिदृश्य जस्ता सुविधाहरू पनि परिसर भित्र प्रदान गरिनेछ।

कर्मचारीहरूको दैनिक आवतजावतलाई ध्यानमा राखेर यी अपार्टमेन्टको स्थान पनि छनोट गरिएको छ। शाओमी स्मार्ट इन्डस्ट्रियल पार्क- शाओमी युथ अपार्टमेन्ट्स (Xiaomi Youth Apartments) बाट केवल ३ किलोमिटर टाढा छ, जबकि मुख्य शाओमी टेक पार्क १० किलोमिटर टाढा अवस्थित छ। कम्पनीले यहाँबाट कार्यालयसम्म दैनिक शटल बस सेवा पनि प्रदान गर्नेछ।

यस बाहेक, २४सै घण्टा सातै दिन कन्सेर्जर सेवा, मोबाइल एप मार्फत मर्मतसम्भारको रिपोर्टिङ, सार्ने सहायता र प्याकेज डेलिभरी जस्ता सुविधाहरू पनि क्याम्पसमा उपलब्ध हुनेछन्।

शाओमीको योजना अनुसार, सन् २०२५ ब्याचका स्नातकहरूले बेइजिङ अपार्टमेन्टहरूको लागि आवेदन दिने पहिलो मौका पाउनेछन्, जसको लागि विन्डो जुन २९ तारिखबाट खोलिएको छ। सन् २०२४ स्नातकहरूको लागि आवेदन जुलाई १३ तारिखबाट सुरु हुनेछ, जबकि सन् २०२३ ब्याचको लागि विन्डो जुलाई २० तारिखबाट खुल्नेछ। यदि एकाइहरू बाँकी भएछन् भने, ती सन् २०२२ वा पछिका वर्षहरूका अन्य योग्य स्नातकहरूलाई दिइनेछ।

गीज्मोचाइनाको रिपोर्टअनुसार, नान्जिङमा, शाओमीले हेक्सी साउथ सीबीडीमा छुट्टै ५६६ अपार्टमेन्टहरू सुरु गरेको छ। यो शाओमी नानजिङ टेक पार्कबाट केवल १०० मिटरको दूरीमा अवस्थित छ। यसमा स्टुडियो र ५५ वर्ग मिटर क्षेत्रफल भएका दुई शयनकक्षका फ्ल्याटहरू समावेश छन्।

यी अपार्टमेन्टहरूको लागि आवेदन जुलाई १ देखि जुलाई ३० तारिखसम्म खुला रहनेछ र छनोट पहिले आउनेलाई पहिलो सेवाको आधारमा गरिनेछ। नानजिंगको विशेष कुरा के हो भने यी अपार्टमेन्टहरू नयाँ स्नातकहरूका लागि मात्र नभई सबै शाओमी कर्मचारीहरूका लागि उपलब्ध हुनेछन्।