टेक्ससमा परीक्षण गरिएका टेस्ला रोबोट्याक्सीहरूका कारण थुप्रै ट्राफिक समस्या निम्तियो: रिपोर्ट

काठमाडौं ।

टेस्लाले अस्टिन, टेक्सासमा सार्वजनिक रूपमा पहिलोपटक परीक्षणमा ल्याएका रोबोट्याक्सीहरूका कारण थुप्रै ट्राफिक समस्या र चालक त्रुटिहरू देखिएको छ। कम्पनीले चयन गरेका प्रयोगकर्ताहरूले सुरुका केही दिनमा खिचेका भिडियोहरूले यो देखाएका हुन्।

सीईओ इलन मस्कले टेस्लाको भविष्य पूर्णतः स्वचालित ड्राइभिङ प्रविधिमा निर्भर रहेको बताएका छन्। अहिले टेस्लाको बिक्री घट्दो क्रममा छ, जसका कारण यो प्रविधाको सफलतामा उच्च दाउ लागिएको छ।

मस्कले यस वर्ष अमेरिकाका अन्य शहरहरूमा सेवा विस्तार गरिने र अर्को वर्षको दोस्रो सत्रसम्म “पुरै स्वचालित रूपमा सञ्चालन हुने लाखौं टेस्लाहरू” हुने भविष्यवाणी गरेका छन्।

परीक्षणमा सहभागी टेस्लाका समर्थकहरूले भने घण्टौंसम्म सहज यात्राको भिडियो पोस्ट गर्दै समर्थन जनाएका छन्। तर, देखिएका समस्याहरूले अमेरिकी संघीय सडक सुरक्षा नियामकहरू र मोटर सुरक्षा विज्ञहरूको ध्यान तानेका छन्।

समस्याहरूमा रोबोट्याक्सीले गलत लेनमा प्रवेश गर्नु, यात्रुहरूलाई बहुपट्टी सडक वा चोकको बीचमै झारिदिनु, अकस्मात ब्रेक लगाउनु, गति सीमा नाघ्नु, र सडकको किनार चढ्नुजस्ता कुराहरू समावेश छन्।

एउटा घटनामा रोबोट्याक्सीले करिब ६ सेकेन्डसम्म विपरीत दिशातर्फ जाने लेनमा प्रवेश गर्‍यो। गाडी चोकमा बायाँ मोडिनुपर्ने लेनमा बायाँ संकेत (ब्लिंकर) दिँदै उभिएको थियो। तर, स्टेरिङ ह्वील हल्लिएपछि गाडी बायाँ मोडिने सट्टा सोझै अगाडि विपरीत दिशाको लेनतर्फ गएको देखिन्छ, जसले पछाडिको गाडीबाट हर्न बजाउन बाध्य बनायो।

अर्को घटनामा, कुनै स्पष्ट अवरोध नहुँदा पनि गाडीले एक्कासि ब्रेक लगायो। त्यसमा बसेको यात्रु अगाडि धकेलिएको र उसका सामानहरू भुइँमा खसेको देखिन्छ। तेस्रो भिडियोमा, एक गाडीबाट लिइएको दृश्यमा, रोबोट्याक्सीले सडकमा दुईपटक एक्कासि रोकिएको देखिन्छ, त्यो बेला पुलिसको गाडीहरू साइरनसहित बाटोमा उभिएका थिए।

परीक्षणमा प्रत्येक गाडीको अगाडिको सीटमा मानव सुरक्षा निरीक्षक पनि राखिएको छ। चौथो घटनामा देखिएको छ कि एक डेलिभरी ट्रक ब्याक गर्न थालेपछि सुरक्षा निरीक्षकले एक बटन थिचेर रोबोट्याक्सी रोक्नु परेको थियो।

“यसरी परीक्षणको पहिलो दिनमै यति धेरै समस्याग्रस्त ड्राइभिङका भिडियो आउनु निकै चाँडो हो,” कार्नेगी मेलोन विश्वविद्यालयका कम्प्युटर इन्जिनियरिङ प्राध्यापक र स्वचालित प्रविधि विज्ञ फिलिप कूपम्यानले भने।

“मैले पहिलो दिनमै यति धेरै त्रुटिपूर्ण भिडियो आउने अपेक्षा गरेको थिइनँ।”
टेस्ला अहिले १० देखि २० वटा रोबोट्याक्सी परीक्षणमा राखिरहेको छ, जुन सबै मोडल वाई गाडीमा अत्याधुनिक सफ्टवेयर राखेर तयार गरिएको हो। र आइतबार दिउँसोदेखि परीक्षण सवारी दिइएको छ।