ब्लूस्काई ‘बिलियनेयर-प्रूफ’ छ: सीईओ ग्राबर

काठमाडौं ।

यस महिनाको राष्ट्रपति चुनावपछि सामाजिक सञ्जाल प्लेटफर्म ब्लूस्काई को लोकप्रियता ह्वात्तै बढेको छ। अब यो इलन मस्कको एक्स र मेटाको थ्रेड्सको बलियो प्रतिस्पर्धी बनेको छ।

तर ब्लूस्काईकी सीईओ जे ग्राबरले सम्भावित खरिदकर्ताहरूलाई सचेत गर्दै भनेकी छिन्, “ब्लूस्काई ‘बिलियनेयर-प्रूफ’ छ।”

सीएनबीसीको “मनी मूभर्स” कार्यक्रममा बिहीबार दिएको अन्तरवार्तामा ग्राबरले ब्लूस्काईको ओपन डिजाइनले प्रयोगकर्ताहरूलाई उनीहरूको सम्पूर्ण फलोअरहरूसहित प्लेटफर्म छोड्ने विकल्प दिने र यसले खरिद प्रयासहरूलाई असफल बनाउन सक्ने बताएकी हुन्।

“सबै कुरा खुला स्रोत भएकाले, कुनै व्यक्तिले यसलाई किन्ने वा कम्पनी बन्द भए पनि ब्लूस्काई मा भएको डाटा तुरुन्तै अन्यत्र सार्न सकिन्छ,” ग्राबरले भनिन्।

यो डिजाइन, ट्विटर (हाल एक्स) मा मस्कको स्वामित्वपछि लाखौं प्रयोगकर्ताले प्लेटफर्म छोडेको घटनाबाट प्रेरित छ। हाल ब्लूस्काई का २१ मिलियन प्रयोगकर्ता छन्, जुन एक्स का करिब ३१८ मिलियन र थ्रेड्सका २७५ मिलियन मासिक प्रयोगकर्ताको तुलनामा कम हो।

ब्लूस्काई २०१९ मा ट्विटरको आन्तरिक परियोजनाका रूपमा सुरु भएको थियो। २०२२ मा यो स्वतन्त्र सार्वजनिक लाभकारी संस्थामा परिणत भयो। पूर्व ट्विटर सीईओ ज्याक डोर्सीले यस परियोजनाको परिकल्पना गरेका थिए।

“डोर्सीले सामाजिक सञ्जालका लागि राम्रो दृष्टिकोण राखेर यस परियोजनालाई सुरु गरे। उनीप्रति हामी कृतज्ञ छौं,” ग्राबरले भनिन्।

ब्लूस्काई प्रयोगकर्ताका लागि पूर्ण नियन्त्रणसहितको खुला स्रोत सामाजिक सञ्जाल निर्माणमा केन्द्रित छ। “कुनै पनि सामाजिक सञ्जालले यसरी खुलापन र पारदर्शिता कहिल्यै दिएको थिएन,” ग्राबरले जोड दिइन्।

ब्लूस्काई ले विज्ञापन आधारित मोडेललाई अस्वीकार गर्दै प्रयोगकर्तालाई विशेष सुविधाहरू पहुँच दिन सब्स्क्रिप्शन सेवा प्रस्ताव गर्ने योजना बनाएको छ। साथै, तेस्रो पक्षका कोडरहरूका लागि नयाँ सेवा उपलब्ध गराउँदै “डेभलपर इकोसिस्टम” निर्माण गर्ने योजना पनि रहेको सीएनबीसीले उल्लेख गरेको छ।

“हामी प्रयोगकर्ताहरूलाई विज्ञापनको माध्यमबाट ‘लक’ गर्ने एल्गोरिदम निर्माण गर्दैनौं। यो हाम्रो मोडेल होइन,” ग्राबरले भनिन्।

सेप्टेम्बरमा, ब्राजिलमा एक्स निलम्बनपछि ब्लूस्काई मा २ मिलियन नयाँ प्रयोगकर्ता थपिएका थिए। अक्टोबरमा, कम्पनीले ब्लकचेन क्यापिटलको नेतृत्वमा १५ मिलियन डलरको लगानी उठाएको घोषणा गर्यो। हालसम्म, कम्पनीले ३६ मिलियन डलर लगानी उठाइसकेको छ।