काठमाडौं ।
स्विडिस टेलिकम अपरेटर टेलियाले आफ्नो काम गर्ने तरिकामा पुनर्संरचना गर्ने योजना बनाएको छ। यसअन्तर्गत सञ्चालनलाई स्थानीयकरण गर्नुका साथै ९०० कर्मचारी कटौती गरिनेछ। कम्पनीले यसबाट वार्षिक १ अर्ब स्विडिस क्रोनर (एसईके) कुल बचत गर्ने लक्ष्य राखेको छ।
टेलियाले आफ्नो साझा प्रविधि एकाइबाट मुख्य रूपमा करिब २२० पद सम्बन्धित देशका एकाइमा स्थानान्तरण गर्ने योजना बनाएको छ। साथै, कम्पनीका सबै एकाइमा गरी ९०० पद कटौती गरिनेछ।
यस कटौतीमा स्थायी कर्मचारी र स्रोत परामर्शदाता दुवै पर्नेछन्। कम्पनीले सञ्चालन खर्च पनि थप घटाउनेछ।
कम्पनीका अनुसार सन् २०२४ को डिसेम्बरदेखि ग्राहककेन्द्रित सञ्चालन मोडेल लागू गर्ने काम भइरहेको छ। यसअन्तर्गत सञ्चालन प्रक्रिया सरल बनाउने र संगठनात्मक जटिलता घटाउने काम गरिएको छ।
कम्पनीले भनेको छ, “यसले ग्राहक सन्तुष्टि बढाउन, वित्तीय कार्यसम्पादन सुधार गर्न, विशेषगरी नगद प्रवाह बढाउन योगदान दिएको छ। साथै, यसले कम्पनीलाई उद्योगका उत्कृष्ट प्रतिभाका लागि थप आकर्षक कार्यस्थल बनाएको छ।”
टेलिकम्स डटकमका अनुसार अब कम्पनीले समूहको रणनीति, लक्ष्य निर्धारण, सुशासन र कार्यसम्पादनको अनुगमनमा ध्यान केन्द्रित गर्नेछ। साझा प्रविधि एकाइले भने सुरक्षा र टेलिभिजन सेवाजस्ता क्षेत्रमा आवश्यक स्रोत र विशेषज्ञता कायम राख्नेछ। यी क्षेत्रमा कामको ठूलो परिमाण र साझा स्रोतको उपयोगबाट फाइदा लिन सकिने कम्पनीको भनाइ छ।
यस पुनर्संरचनाले सन् २०२६ का लागि कम्पनीले तय गरेको वित्तीय लक्ष्यमा असर नपर्ने अपेक्षा गरिएको छ। ती लक्ष्यमा समान आधारमा सेवा राजस्व र समायोजित ब्याज, कर, मूल्यह्रास तथा परिशोधनअघिको आम्दानी (ईबीआईटीडीए) मा वृद्धि, स्पेक्ट्रम र लिजबाहेकको पुँजीगत खर्च (क्यापेक्स) तथा स्वतन्त्र नगद प्रवाह समावेश छन्।
टेलियाले सन् २०२६ को चौथो त्रैमासिकमा पुनर्संरचनाका लागि करिब ६० करोड स्विडिस क्रोनर खर्च लाग्ने अनुमान गरेको छ, जसको प्रभाव नगद प्रवाहमा मुख्यतया सन् २०२७ मा देखिनेछ।
टेलियाका अध्यक्ष तथा प्रमुख कार्यकारी अधिकृत प्याट्रिक होफबाउरले भने, “हामी भविष्यको टेलिया निर्माण गर्दैछौँ। अहिलेसम्मका प्रयासले हामीलाई सही दिशामा अघि बढाएका छन्। थप स्थानीयकरण गर्नु भनेको परिणाम दिने काममा अझ बढी ध्यान केन्द्रित गर्नु हो।
प्रस्तावित स्थानीयकरण र पद कटौतीको काम डिसेम्बर ३१ सम्ममा पूरा हुने अपेक्षा गरिएको छ।
प्रकाशित: २७ आश्विन २०८३, मंगलवार
