सञ्चार मन्त्रालयको जिम्मा पृथ्वी सुब्बा गुरुङलाई

काठमाडौं ।

केपी शर्मा ओलीको नेतृत्वको सरकारमा नेकपा एमालेका पृथ्वीसुब्बा गुरुङलाई सञ्चार मन्त्रालयको जिम्मेवारी दिईने भएको छ। उनी सञ्चारमन्त्री बन्ने तय भएको छ।

विज्ञानमा स्नातक गरेका गुरुङ गण्डकी प्रदेशका संस्थापक मुख्यमन्त्री हुन्।उनी हाल एमालेका उपमहासचिव समेत हुन्।

यसअघि उनी २०६२/०६३ को दोस्रो जनआन्दोलन सफल भएपछि नेपाली कांग्रेसका तत्कालीन सभापति गिरिजाप्रसाद कोइराला नेतृत्वको सरकारमा संस्कृति, पर्यटन तथा नागरिक उड्ययन मन्त्री पनि बनेका थिए।

नवनियुक्त प्रधानमन्त्री केपी शर्मा ओलीले आज पद तथा गोपनीयताको शपथ लिँदै छन्। राष्ट्रपति रामचन्द्र पौडेलसमक्ष आज शीतल निवासमा आयोजना हुने विशेष समारोहमा प्रधानमन्त्री ओलीले पद तथा गोपनीयताको शपथ लिने कार्यक्रम रहेको छ।

प्रधानमन्त्री ओलीबाट आजै मन्त्रिपरिषद्को विस्तार भएपछि नव नियुक्त मन्त्रीहरुको पनि पद तथा गोपनीयताको शपथ हुने कार्यक्रम रहेको छ।