काठमाडौं ।
भारतीय दूरसञ्चार नियामक प्राधिकरण ट्राईले बिहीबार एक आदेश जारी गर्दै मोबाइल प्रयोगकर्ताहरूलाई ठूलो राहत दिएको छ। वास्तवमा, ट्राईले यूएसएसडी शुल्क हटाउने निर्णय गरेको भारतीय मिडियाहरुले जनाएका छन्।
यूएसएसडीको पूरा रूप अनस्ट्रक्चर्ड सप्लिमेन्ट्री सर्भिसेज डाटा हो।
यूएसएसडी छोटो सन्देश सेवा (एसएमएस) जस्तै हुन्छ। यो एक विश्वव्यापी प्रणाली हो, जुन मोबाइल संचारको लागि प्रयोग गरिन्छ। यो मोबाइल ब्यालेन्स जाँच गर्ने, फीचर फोनहरूमा वैधता जाँच गर्ने जस्ता धेरै कुराहरूमा प्रयोग गरिन्छ।
ट्राईले खारेज गरेको यूएसएसडी शुल्क फिचर फोन वा बार फोन प्रयोगकर्ताहरूलाई इन्टरनेट कनेक्सन बिना मोबाइल बैंकिङ र भुक्तानीहरू गर्न अनुमति दिने शुल्क हो। यो सुविधा प्रायः ती प्रयोगकर्ताहरूले प्रयोग गर्छन्, जसको फोनमा इन्टरनेट सुविधा छैन।
हालसम्म फिचर फोन प्रयोगकर्ताहरूले मोबाइल बैंकिङ र भुक्तानी सुविधाहरू प्रयोग गर्दा शुल्क तिर्नुपर्ने थियो, जसलाई यूएसएसडी शुल्क भनिन्छ। युएसएसडी मार्फत टेलिकम कम्पनीहरूले आफ्ना प्रयोगकर्ताहरूलाई एसएमएस वा कलमार्फत बैंकिङ अलर्टबारे जानकारी गराउने गर्थे र बदलामा उनीहरूबाट केही शुल्क लिने गर्दथे। यो शुल्कको दर प्रति यूएसएसडी भारु ५० पैसा थियो।
समाचार रिपोर्टकाअनुसार ट्राईले तत्काल प्रभावबाट, कुनै पनि फिचर फोन प्रयोगकर्ताहरूलाई मोबाइल बैंकिङको लागि यूएसएसडी शुल्क नलाग्ने घोषणा गरेको छ। ट्राईले एक सूचना जारी गर्दै भनेको छ, “मोबाइल बैंकिङ वा भुक्तानी सेवाहरूका लागि ग्राहकहरूबाट कुनै यूएसएसडी शुल्क नलाग्ने र यो निर्णय तत्काल प्रभावबाट लागू गरिएको छ।”
ट्राईले यो निर्णय निकै सावधानीपूर्वक लिएको बताएको छ। यो निर्णयको उद्देश्य डिजिटल अर्थतन्त्र र भुक्तानीलाई प्रवर्द्धन गर्नु हो। ट्राईले यो नयाँ निर्णयले डिजिटल अर्थतन्त्रलाई कत्तिको फाइदा पुर्याएको छ भनेर आगामी दुई वर्षसम्म समीक्षा गरिने जनाएको छ।
ट्राईले देशमा स्मार्टफोनको चलन निरन्तर बढ्दै गएको तर अझै पनि फिचर फोन प्रयोग गर्ने धेरै प्रयोगकर्ता रहेको र उनीहरूसँग इन्टरनेट जडानको सुविधा नभएको बताएको छ।
प्रकाशित: २६ चैत्र २०७८, शनिबार
