काठमाडौं ।
गुगलले यूरोपेली संघ (ईयू) मा आफ्नो सर्च सेवामा परिवर्तन गर्ने भएको छ। यसबाट यस वर्षको सुरुवातमा युरोपेली आयोगले लगाएको करिब ८९० मिलियन यूरो (करिब १ अर्ब डलर) जरिवानाबाट जोगिने प्रयास कम्पनीले गरेको हो।
ईयूले गुगलले सर्च क्षेत्रमा आफ्नो प्रभुत्वको दुरुपयोग गर्दै सर्च नतिजा देखाउँदा आफ्ना अन्य सेवाहरूलाई प्राथमिकता दिएको आरोपमा ४६० मिलियन युरो (करिब ५३४ मिलियन डलर) जरिवाना गरेको थियो।
यो जरिवाना डिजिटल मार्केट्स एक्ट (डीएमए) उल्लंघन गरेको आरोपमा ईयू र अमेरिकी प्रविधि कम्पनीबीचको पछिल्लो विवाद हो। डीएमएका अनुसार ठूला प्रविधि कम्पनीले तेस्रो पक्षका सेवाभन्दा आफ्नै सेवालाई सर्च नतिजाको क्रममा बढी प्राथमिकता दिन पाउँदैनन्।
गुगलले डिजिटल मार्केट्स एक्टअनुसार आफ्ना सेवामा गर्न लागेका केही परिवर्तनबारे पहिलोपटक मार्च २०२४ मा जानकारी दिएको थियो। त्यसै महिनाको अन्त्यमा युरोपेली आयोगले गुगलसँगै एप्पल र मेटाविरुद्ध आफ्नै सेवाहरूलाई प्राथमिकता दिइरहेको विषयमा अनुसन्धान सुरु गरेको थियो।
यात्रासम्बन्धी गुगल सर्च गर्दा प्रतिस्पर्धी सेवाभन्दा माथि गुगल फ्लाइट्सको जानकारी देखाउनेजस्ता अभ्यासलाई आयोगले अनुसन्धानको विषय बनाएको थियो। त्यसको एक वर्षपछि आयोगले गुगलले आफ्ना सेवाहरूलाई अनुचित रूपमा प्राथमिकता दिएको आरोपमा पहिलो जरिवाना गरेको थियो।
अक्टोबर २०२५ मा आएका रिपोर्टअनुसार गुगलले ईयूका नियम पूरा गर्न सर्च नतिजा देखाउने तरिकामा परिवर्तन गर्ने प्रस्ताव गरेको थियो।
अब गुगलले संशोधित सर्च नतिजामा पेजको माथि एउटा विशेष सर्च इन्जिन देखाउने र त्यसपछि कम विवरणसहित अन्य दुई सर्च इन्जिन देखाउने भएको छ। उदाहरणका लागि होटल, एयरलाइन्स र रेस्टुरेन्टको सूची त्यसको तल देखाइनेछ। तर वास्तविक समयका मूल्यजस्ता महत्वपूर्ण विवरण हटाइनेछन्।
इन्ग्याजेटका अनुसार यी विशेष सर्च इन्जिनमा एक्सपेडिया र होटल्स डटकमजस्ता साइटहरू पनि पर्छन्, जसलाई भर्टिकल सर्च सेवा भनिन्छ। त्यसैले युरोपका प्रयोगकर्ताले अब व्यक्तिगत व्यवसायका वेबसाइटभन्दा यस्ता एग्रिगेटर र तुलना गर्ने साइटलाई सर्च नतिजामा बढी प्राथमिकतामा देख्न सक्छन्।
सर्च नतिजाको क्रम गुगलको एल्गोरिदमले निर्धारण गर्नेछ। यसको अर्थ नतिजा कसरी देखाउने भन्ने विषयमा गुगलको अझै ठूलो नियन्त्रण रहनेछ।
यूरोपेली आयोगले गुगललाई नियम पालना गर्न ६० दिनको समय दिएको थियो। तर यूरोपेली प्रयोगकर्ताले नयाँ परिवर्तन कहिलेदेखि देख्न थाल्नेछन् भन्ने निश्चित मिति गुगलले सार्वजनिक गरेको छैन।
गुगलका अधिकारीहरूले भने डीएमए पालना गर्नुपर्ने बाध्यताका कारण सर्च नतिजाको गुणस्तर घट्ने दाबी गरेका छन्। गुगलले रोयटर्सलाई दिएको जानकारीअनुसार यी परिवर्तनले कम्पनीको सर्च इन्जिनको इतिहासमै सेवाको गुणस्तरमा सबैभन्दा ठूलो कमी ल्याउनेछ।
“यी परिवर्तनले युरोपेली प्रयोगकर्ताको अनुभव कमजोर बनाउँछन्। यसले स्थानीय व्यवसायको मूल्यमा अनलाइन मध्यस्थ सेवाहरूलाई बढावा दिन्छ र मानिसहरूले दैनिक रूपमा प्रयोग गर्ने उपयोगी सुविधा हटाउँछ,” गुगलका ज्ञान तथा सूचना विभागका वरिष्ठ उपाध्यक्ष निक फक्सले भने।
गुगलका अनुसार डीएमए पालना गर्न विगतमा गरिएको सर्च परिवर्तनका कारण युरोपेली व्यवसायमा प्रत्यक्ष रूपमा निःशुल्क आउने बुकिङ ट्राफिक ३० प्रतिशतले घटेको थियो। नयाँ परिवर्तनपछि यो ट्राफिक अझ घट्न सक्ने कम्पनीले जनाएको छ।
प्रकाशित: २५ भाद्र २०८३, बिहीबार
