काठमाडौं ।
नेपाल आउने विदेशी नागरिकहरूको तथ्यांक राख्ने विदेशी राष्ट्रिय व्यवस्थापन सूचना प्रणाली (FNMIS)’ आजदेखि लागू भएको छ।
अध्यागमन विभागले आज यहाँ आयोजना गरेको ‘विदेशी राष्ट्रिय व्यवस्थापन सूचना प्रणाली (एफएनएमआईएस)’ को गृहमन्त्री ओमप्रकाश अर्यालले शुभारम्भ गर्दै नेपाल भ्रमणमा आउने विदेशी नागरिकहरूको यात्रा सुरक्षामा सहयोग गर्ने बताए।
गृहमन्त्री अर्यालले यसले सूचना प्रवाहलाई सहज बनाउने, सम्भावित अपराध नियन्त्रण गर्ने र पर्यटन प्रवर्द्धन गर्ने उद्देश्यले आज उद्घाटन गरिएको यो प्रणाली अध्यागमन सूचना व्यवस्थापन प्रणालीमा कोसेढुङ्गा साबित हुने विश्वास व्यक्त गरे।
उनले सुशासन कायम राख्दै, कानूनको शासन र भ्रष्टाचारमुक्त प्रशासन सुनिश्चित गर्दै जिम्मेवारी हस्तान्तरण गर्ने जनादेशसहित वर्तमान सरकारले निर्वाचनको तयारीलाई तीव्र पारेको बताए।
विभागका महानिर्देशक रामचन्द्र तिवारीले यो प्रणालीले अध्यागमन कानून अनुसार विदेशी नागरिकहरूको प्रवेश, निकास र बसाइलाई अझ प्रभावकारी बनाउने जानकारी दिए। प्रणालीले आगन्तुकहरूको व्यक्तिगत सुरक्षालाई सुदृढ पार्ने, विपद्को समयमा खोज र उद्धारलाई सहज बनाउने र नेपालमा उनीहरूको बसाइको क्रममा हुन सक्ने अवांछित गतिविधिहरूको निगरानी गर्ने उनले बताए।
त्यस्तै गरी, यो प्रणालीले अपराधको घटनामा अनुसन्धानलाई अझ प्रभावकारी बनाउनेछ र नेपाललाई विश्वव्यापी स्तरमा सुरक्षित पर्यटकीय गन्तव्यको रूपमा विकास गर्न मद्दत गर्ने बताईएको छ।
प्रकाशित: १७ पुष २०८२, बिहीबार
