प्रतिस्पर्धा आयोगको निर्देशनका कारण भारतमा मेटाका केही सुविधाहरू कटौती हुने सम्भावना

काठमाडौं ।

भारतमा प्रतिस्पर्धा आयोगको निर्देशनका कारण मेटालाई केही सुविधाहरू रोक्न वा स्थगन गर्नुपर्ने सम्भावना देखिएको छ।

यो निर्देशनले व्हाट्सएपलाई प्रयोगकर्ताका डाटा विज्ञापन उद्देश्यका लागि मेटासँग बाँड्न प्रतिबन्ध लगाएको छ। यो जानकारी रोयटर्सले हेरेको अमेरिकी कम्पनीको अदालती फाइलिङबाट खुलेको बताइएको छ।

मेटाले भारतको प्रतिस्पर्धा आयोग (सीसीआई) को नोभेम्बर निर्देशालाई खारेज गर्न खोजिरहेको छ। सीसीआईले कम्पनीले आफ्नो प्रभुत्व दुरुपयोग गरी २०२१ को गोपनीयता नीति स्वीकार्न व्हाट्सएप प्रयोगकर्तालाई “जबरजस्ती” गराएको ठहर गरेको थियो।

यस नीतिले प्रयोगकर्ता डाटा सङ्कलन र साझेदारीलाई विस्तार गरेको आरोप लगाइएको छ, जसले प्रतिस्पर्धीहरूलाई अन्यायपूर्ण फाइदा दिएको बताइएको छ।

सीसीआईले मेटालाई २४.५ मिलियन डलर जरिवाना लगाएको छ र डाटा साझेदारी अभ्यासमा पाँच वर्षको प्रतिबन्ध लगाएको छ। भारत मेटाका लागि सबैभन्दा ठूलो बजार हो, जहाँ ३५० मिलियनभन्दा बढी फेसबुक प्रयोगकर्ता र ५०० मिलियनभन्दा बढी व्हाट्सएप प्रयोगकर्ता छन्।

मेटाले सार्वजनिक रूपमा आफ्नो नीति परिवर्तनको बचाउ गरेको छ र सीसीआईको आदेशसँग असहमति जनाएको छ। तर, आफ्नो अपिल फाइलिङमा कम्पनीले सीसीआईको काम गर्ने तरिकालाई कडा आलोचना गरेको छ।

रोयटर्सले समीक्षा गरेको करिब २,००० पृष्ठको अदालती फाइलिङका अनुसार व्हाट्सएप-टू-मेटा डाटा साझेदारीमा लगाइएको प्रतिबन्धले फेसबुक र इन्स्टाग्राममा व्यक्तिगत विज्ञापन प्रदान गर्ने मेटाको क्षमता सीमित गर्ने चिन्ता कम्पनीलाई छ।

व्हाट्सएपले सार्वजनिक रूपमा प्रयोगकर्ताको फोन नम्बर, लेनदेन डेटा, व्यवसायहरूसँगको अन्तरक्रिया र मोबाइल उपकरण जानकारी मेटासँग साझा गर्ने बताएको छ।

मेटाले फाइलिङमा यो प्रतिबन्धले भारतका फेसन व्यवसायहरूले व्हाट्सएप प्रयोगकर्तासँगको अन्तरक्रियाका आधारमा फेसबुक वा इन्स्टाग्राममा विज्ञापनहरू निजीकृत गर्न नसक्ने सम्भावना रहेको बताएको छ।

“यो निर्देशनको सबैभन्दा व्यापक व्याख्या अनुसार, यसलाई कार्यान्वयन गर्दा मेटालाई केही सुविधाहरू र उत्पादनहरू रोक्न वा स्थगन गर्नुपर्ने हुन सक्छ,” फाइलिङमा उल्लेख गरिएको छ। “यसले मेटा र व्हाट्सएपलाई व्यावसायिक रूपमा टिक्न कठिन बनाउँछ,” कम्पनीले थपेको छ।

मेटाले आफ्नो आर्थिक प्रभावबारे ठोस आँकडा भने उल्लेख गरेको छैन। तर भारतमा विज्ञापन बिक्रीमा संलग्न फेसबुक इण्डिया अनलाइन सर्भिसेजले २०२३-२४ मा ३५१ मिलियन डलर आम्दानी रिपोर्ट गरेको छ जुन पछिल्ला पाँच वर्षमा सबैभन्दा बढी हो।

भारतीय अपिल ट्रिब्युनलले बिहीबार मेटाको अपिल सुन्नेछ। यो मुद्दा हप्ता वा महिनौंसम्म चल्न सक्छ, तर यस बीचमा ट्रिब्युनलले सीसीआईको निर्देशनलाई स्थगन गर्न सक्छ।

मेटा र सीसीआई दुवैले रोयटर्सका प्रश्नहरूको जवाफ नदिएको उल्लेख गरिएको छ।