Technology Khabar १४ भाद्र २०७८, सोमबार
काठमाडौं ।
पोर्चुगलका फुटबर स्टार क्रिस्टियानो रोनाल्डो म्यान्चेस्टर युनाइटेडमा फर्किएसँगै क्लबको इन्स्टाग्राम फलोअरमा समेत रेकर्ड कायम भएको छ । रोनाल्डोले फुटबलको मैदान मात्र होइन, सामाजिक सञ्जालामा पनि कीर्तिमान भंग गरिरहेका छन् ।
उनी फर्किएको दुई घण्टामा नै म्यान्चेस्टर युनाइटेडले इन्स्टाग्राममा १० लाख भन्दा धेरै फलोअर कमाएको थियो ।
यसका साथै उनी क्लबमा फर्किएको घोषणा गरेको पोस्टले समेत १ करोड २९ लाख बढी लाइक पाइसकेको छ।
योसँगै म्यान्चेस्टर युनाइटेडको इन्स्टाग्राम पोस्टले कुनै पनि खेलकुदको टोलीले पाएको मध्ये सबैभन्दा धेरै लाइक पाउने कीर्तिमान बनेको छ।
युनाइटेडको घोषणाले धेरैको ध्यान खिचेको छ र क्लबलाई इन्स्टाग्राममा फलोअर्सको एक विशाल संख्याले फलो गरेको देखिएको बेलायती मिडिया डेलीमेलले उल्लेख गरेको छ।
यो घोषणा हुनुभन्दा पहिले क्लबको सामाजिक मिडिया एकाउन्टमा ४ करोड ३१ लाख अनुयायीहरु थिए तर केहि घण्टा पछि त्यो संख्या ४ करोड ४३ लाखसम्म बढेको थियो।
रोनाल्डो फुटबलको सबैभन्दा ठूलो नाम र खेलको इतिहासमा सबैभन्दा प्रसिद्ध खेलाडीहरु मध्ये एक हुन् ।
यसअघि पेरिस सेन्ट जर्मेनले लियोनेल मेस्सी क्लबमा आबद्ध भएको घोषणा गरेको पोस्टले ७८ लाख १९ हजार बढी लाइक पाएको थियो ।
तर, सबैभन्दा चर्चित खेलकुद फोटोको कीर्तिमान भने लियोनेल मेस्सीको नाममा रहेको छ। मेस्सीले सन् २०२१ को जुलाईमा कोपा अमेरिकाको ट्रफीसँग खिचेको फोटो पोस्ट गर्दा २ करोड १९ लाख ३५ हजार बढी लाइक पाएको थियो ।
दोस्रो स्थानमा क्रिस्टियानो रोनाल्डोले म्याराडोनाको सम्झनामा पोस्ट गरेको फोटो रहेको छ । सन् २०२० को नोभेम्बर २५ मा पोस्ट गरिएको फोटोले १.९८ करोड लाइक बटुलेको थियो ।
रोनाल्डो युनाइटेडमा आएसँगै क्लबलाई मिडिया र सामाजिक सञ्जालहरुमा बिस्तार गर्न समेत निकै फाईदा हुने देखिएको बताईएको छ।
प्रकाशित: १४ भाद्र २०७८, सोमबार
