Technology Khabar २ बैशाख २०७७, मंगलवार
काठमाडौं ।
रोबोटिक एसोसिएसन अफ नेपालले पहिलो पटक फुड क्यारिङ्ग रोबोटको सफल परीक्षण गरेको छ ।
संस्थाले हालै आफूले तयार पारेको सो रोबोटलाई टिचिङ्ग अस्पतालका बायोमेडिकल इन्जिनियरहरुको सहयोगमा परीक्षण गरेको हो ।
सो रोबोट एसोसिएसनका तर्फबाट पृथ्वी चौधरीको नेतृत्वको टिमले तयार पारेको हो । जून रोबोटले अस्पतालमा भएका बिरामीहरुको बेडसम्म खानेकुराहरु ल्याउँछ ।
फुड क्यारिङ्ग रोबोटले टिचिङ्ग अस्पतालमा तयार पारिएको आइसोलेसन वार्डमा कोभिड १९ को उपचारको क्रममा सहयोग गर्ने अपेक्षासहित तयार पारीएको हो ।
परीक्षणको क्रममा रोबोटले एफपिभी सेट कसरी प्रयोग गर्ने, कसरी रोबोटलाई नियन्त्रण गर्ने र खाना डेलिभरी गर्दा कसरी संचालन गर्ने भन्ने परीक्षण गरिएको थियो ।
एसोसिएसनले सोहि रोबोटलाई आजै स्वास्थ्य तथा जनसंख्या मन्त्रालयमा समेत परीक्षण र प्रदर्शन गर्नेछ ।
तयार पारीएको रोबोटले स्वास्थ्यकर्मीहरुलाई कोभिड १९ का बिरामीहरुसँगको एक्सपोजरबाट बचाउन सहयोगी हुने एसोसिएसनको भनाई छ ।
यसबाहेक एसोसिएसनले ड्रोन एयर भेन्टिलेटर र नेपाल इन्नोभेसन म्यापर टूल समेत तयार पारीरहेको जनाएको छ।
प्रकाशित: २ बैशाख २०७७, मंगलवार
