काठमाडौं ।
अनरको ७०० सिरिज आगामी महिना चीनमा सार्वजनिक हुने अपेक्षा गरिएको छ। यसैबीच, वेइबोका दुई चर्चित टिपस्टरले फोनका थप विशेषताबारे जानकारी सार्वजनिक गरेका छन्।
डिजिटल च्याट स्टेसनका अनुसार अनर ७०० र अनर ७०० प्रो दुवैमा २०० एमएम टेलिकन्भर्टर सपोर्ट हुनेछ। उनका अनुसार यो सिरिजमा अल्ट्रा–न्यारो बेजेल भएको मध्यम आकारको स्क्रिन, ठूलो ब्याट्री, पछाडिपट्टि बिल्ट–इन स्क्रिन, स्न्यापड्रागन चिपसेट र पेरिस्कोप टेलिफोटो क्यामेरा रहनेछ। साथै, कम्पनीले यस सिरिजको ब्रान्ड एम्बेसडरका रूपमा चर्चित सेलिब्रेटीलाई नियुक्त गर्नेछ।
अर्कोतर्फ, स्मार्ट पिकाचुले अनर ७०० सिरिजका लागि प्रि–बुकिङ चाँडै खुल्ने जनाएको छ। उनका अनुसार यस सिरिजमा १०० मेगापिक्सेल श्रेणीको क्यामेरा, लामो समय टिक्ने ब्याट्री, अल्ट्रा–न्यारो बेजेल भएको स्क्रिन, पछाडिपट्टि रचनात्मक डिजाइनको स्क्रिन, टेलिकन्भर्टर सपोर्ट र आकर्षक डिजाइन रहनेछ। यसका अगाडि र पछाडि दुवै क्यामेराबाट लाइभ फोटो खिच्न सकिने सुविधा पनि हुनेछ।
स्मार्ट पिकाचुले नयाँ ब्रान्ड एम्बेसडरबारे पनि उल्लेख गर्दै आफ्नो पोस्टमा चिनियाँ अभिनेत्री जु जिङयीलाई ट्याग गरेको छ। यसले डिजिटल च्याट स्टेसनले उल्लेख गरेको चर्चित सेलिब्रेटी उनी हुन सक्ने संकेत गरेको छ।
गत साता सार्वजनिक गरेको पोस्टमा डिजिटल च्याट स्टेसनले अनर ७०० सिरिजमा तीनवटा मोडल रहने बताएको थियो। उनका अनुसार अनर ७०० प्रोको इन्जिनियरिङ प्रोटोटाइपमा चारैतिर अत्यन्त साँघुरो बेजेल भएको ६.५७ इन्चको १.५के डिस्प्ले हुनेछ।
त्यसैगरी, फोनको पछाडिपट्टि १.७२ इन्चको स्क्रिन, २०० मेगापिक्सेलको मुख्य क्यामेरा र ५० मेगापिक्सेलको पेरिस्कोप टेलिफोटो क्यामेरा रहनेछ। यसमा करिब ९ हजार एमएएच क्षमताको ब्याट्री हुनेछ, जुन अनर ७०० सिरिजकै सबैभन्दा ठूलो ब्याट्री हुनेछ।
अनर ७०० सिरिजका स्मार्टफोनहरू कुल ह्वाइट, क्लियर स्काई, ब्लुज र पिंक मिस्ट नामका रङमा उपलब्ध हुने अपेक्षा गरिएको छ।
प्रकाशित: १८ कार्तिक २०८३, बुधबार
