काठमाडौं ।
सामसङले ग्यालेक्सी एस२४ सिरिज र ग्यालेक्सी जेड फोल्ड ६ तथा जेड फ्लिप ६ का लागि एन्ड्रोइड १७ मा आधारित वन यूआई ९ अपडेट अमेरिकामा उपलब्ध गराउन थालेको छ।
सामसङले नयाँ अपडेट सार्वजनिक गर्न थालेको करिब एक महिनापछि यी डिभाइसमा पनि अपडेट उपलब्ध गराएको हो। यसअघि ग्यालेक्सी जेड फोल्ड ८, जेड फोल्ड ८ अल्ट्रा र ग्यालेक्सी एस२६ सिरिजमा वन यूआई ९ उपलब्ध गराइएको थियो।
सामसङको अपडेटसम्बन्धी समाचार प्रकाशित गर्ने वेबसाइट साममोबाइलका अनुसार हाल यो अपडेट अमेरिका र दक्षिण कोरियामा उपलब्ध छ। आगामी केही दिनमा अन्य क्षेत्रमा पनि अपडेट विस्तार हुने अपेक्षा गरिएको छ।
इन्ग्याजेटका अनुसार वन यूआई ९ अपडेट ग्यालेक्सी एस२४, एस२४ प्लस र एस२४ अल्ट्रासहित जेड फोल्ड ६ तथा जेड फ्लिप ६ मा उपलब्ध हुनेछ। प्रयोगकर्ताले आफ्नो फोनको सेटिङ्समा गएर सफ्टवेयर अपडेट खण्डबाट नयाँ संस्करण जाँच गर्न सक्नेछन्।
वन यूआई ९ मा भिडियो खिच्दा विषयवस्तुलाई स्वचालित रूपमा पछ्याउने र फ्रेम मिलाउने ‘माई फ्यानक्याम’ सुविधा समावेश छ। त्यस्तै, ‘नाउ ब्रिफ’ मा जेनेरेटिभ तथा सम्पादन गर्न मिल्ने कार्ड, सेटिङ्समै वारेन्टी तथा मर्मतसम्बन्धी विवरण र थप ग्यालेक्सी एआई सुविधाहरू उपलब्ध हुनेछन्।
अपडेटमा ‘नाउ नज’, ‘क्रिएटिभ स्टुडियो’, ‘इन्टरप्रिटर’, ‘डकुमेन्ट स्क्यान’ र ‘भ्वाइस रेकर्डर’ जस्ता सुविधा पनि समावेश छन्। यसका साथै सुरक्षा जानकारी दिने ‘सिक्युरिटी ब्रिफ’, गोपनीयतासम्बन्धी अलर्ट र ठगी पहिचान गर्ने सुविधा थप गरिएको छ।
सामसङले ग्यालेक्सी एस२५ सिरिज र जेड फोल्ड ५ मा भने यो अपडेट उपलब्ध गराइसकेको छैन। ती डिभाइसमा पनि आगामी दिनमा अपडेट आउने अपेक्षा गरिएको छ। पुराना ग्यालेक्सी डिभाइसमा भने अपडेट उपलब्ध हुन अझै केही साता लाग्न सक्ने बताइएको छ।
प्रकाशित: २८ आश्विन २०८३, बुधबार
