काठमाडौं ।
अर्बपति इलन मस्कको एक्स कर्प र स्पेसएक्स एआईले सोमबार एप्पलविरुद्धको आफ्नो दाबी टुंग्याएको बताएका छन्। उक्त मुद्दामा आईफोन निर्माता एप्पलले ओपनएआईसँग मिलेर स्मार्टफोन र जेनेरेटिभ एआई च्याटबट बजारमा गैरकानुनी रूपमा एकाधिकार कायम गर्न खोजेको आरोप लगाइएको थियो।
अदालतमा दायर गरिएको निवेदनमा एक्स र स्पेसएक्सको एक विभाग स्पेसएक्सएआईले गत वर्ष एप्पल र ओपनएआईविरुद्ध दायर गरेको मुद्दामा गरिएका दाबी खारेज गर्न माग गरेका छन्। निवेदनमा दाबी खारेज गर्नुको कारण खुलाइएको छैन र कुनै सम्झौता भएको हो कि होइन भन्ने पनि उल्लेख छैन।
यो टुंगोले तीव्र रूपमा विस्तार भइरहेको एआई च्याटबट बजारमाथिको नियन्त्रणलाई लिएर मस्क र विश्वकै मूल्यवान कम्पनीमध्ये एक एप्पलबीच चलेको चर्चित कानुनी लडाइँ अन्त्य गरेको छ। तर ओपनएआईविरुद्धका दाबी भने जारी रहनेछन्।
मुद्दामा एप्पलले आईफोन र अन्य एप्पल डिभाइसमा एप्पल इन्टेलिजेन्सका सुविधामा ओपनएआईको च्याटजीपीटीलाई मात्रै समावेश गरेर प्रतिस्पर्धाविरोधी कानुन उल्लंघन गरेको आरोप लगाइएको थियो।
ओपनएआईसँगको साझेदारीमार्फत एप्पलले प्रतिस्पर्धीहरूलाई गैरकानुनी रूपमा बजारबाट बाहिर राखेको दाबी गरिएको थियो।
एक्स र स्पेसएक्सएआईले मुद्दामा प्रतिवादी रहेको ओपनएआईविरुद्धका दाबी भने निरन्तर अघि बढाउने बताएका छन्।
मस्कका कम्पनीहरूले टिप्पणीका लागि गरिएको अनुरोधमा तत्काल प्रतिक्रिया दिएनन्। एप्पल र ओपनएआईले पनि प्रतिक्रिया दिएनन्।
ओपनएआईले सोमबार अदालतमा दायर गरेको निवेदनमा आफू उक्त सम्झौतामा संलग्न नरहेको र त्यसका सर्तबारे आफूलाई जानकारी नभएको बताएको छ।
रोयटर्सका अनुसार उक्त सम्झौताले मुद्दाका दाबी र ओपनएआईको प्रतिरक्षामा सम्भावित प्रभाव पार्ने भन्दै ओपनएआईले एक्ससँग सम्झौता उपलब्ध गराउन आग्रह गरेको जनाएको छ।
मुद्दामा एप्पल र ओपनएआईले “एकाधिकार कायम राख्न र एक्स तथा एक्सएआईजस्ता नयाँ कम्पनीलाई प्रतिस्पर्धा गर्नबाट रोक्न बजारलाई आफ्नो नियन्त्रणमा राखेको” आरोप लगाइएको थियो। नोभेम्बरमा एक न्यायाधीशले मुद्दा अघि बढाउन सकिने फैसला गरेका थिए। यो मस्कका लागि प्रारम्भिक सफलता थियो।
ओपनएआई र एप्पल दुवैले कुनै गलत काम नगरेको बताएका छन्। ओपनएआईले अदालतमा दायर गरेको निवेदनमा मस्कले आफूविरुद्ध “कानुनी लडाइँको अभियान” चलाएको आरोप लगाएको थियो। एप्पलले मुद्दा खारेज गर्न माग गर्दै आईफोनमा ओपनएआईको प्रविधि समावेश गर्नु विशेष वा एकलौटी नभएको बताएको थियो।
मे महिनामा मस्कले दायर गरेको अर्को मुद्दामा ओपनएआईले सफलता हासिल गरेको थियो। उक्त मुद्दामा ओपनएआई मानवताको हितका लागि नाफा कमाउने उद्देश्यबिना कृत्रिम बुद्धिमता विकास गर्ने आफ्नो प्रारम्भिक उद्देश्यबाट विचलित भएको आरोप मस्कले लगाएका थिए।
सन् २०२२ को अन्त्यमा सार्वजनिक भएपछि केही महिनामै ओपनएआईको च्याटजीपीटी इतिहासकै सबैभन्दा तीव्र गतिमा बढ्ने उपभोक्ता एप बनेको थियो। मस्कको एक्सएआईले आफ्नो च्याटबटको प्रशिक्षण क्षमता बढाउन गत वर्ष सामाजिक सञ्जाल प्लेटफर्म एक्सलाई ३३ अर्ब डलरमा खरिद गरेको थियो।
प्रकाशित: ३१ भाद्र २०८३, बुधबार
