चीनले सन् २०३० सम्म स्वचालित रूपमा चल्ने सवारीसाधनको ठूलो स्तरमा प्रयोग गर्ने लक्ष्यसहित स्मार्ट विद्युतीय सवारीसाधन उद्योगका लागि नयाँ रोडम्याप सार्वजनिक गरेको छ।

चीनको उद्योग मन्त्रालयले बिहीबार सार्वजनिक गरेको रोडम्यापमा राजमार्ग, सहरी एक्सप्रेसवे तथा छनोट गरिएका सहरी सडकमा स्वचालित ड्राइभिङ प्रविधि विस्तार गर्ने लक्ष्य राखिएको छ।

मन्त्रालयले विश्वको बिक्रीका आधारमा शीर्ष १० मा पर्ने चिनियाँ सवारीसाधन उत्पादक कम्पनीहरूको संख्या बढाउने योजना पनि अघि सारेको छ। साथै, चिनियाँ अटो ब्रान्डको विश्वव्यापी आकर्षण बढाउने र अन्तर्राष्ट्रिय अटोमोटिभ मापदण्ड निर्माणमा चीनको प्रभाव बलियो बनाउने लक्ष्य राखिएको छ।

रोडम्यापअनुसार स्वचालित सवारीसाधनले मानव चालकभन्दा उच्च सुरक्षा स्तर हासिल गर्ने गरी प्रविधिको विकास गरिनेछ। त्यसका लागि सवारी उत्पादन, सडक सुरक्षा, स्वचालित ड्राइभिङ र सफ्टवेयर अपडेटसम्बन्धी नियम थप कडा बनाइनेछ। महत्वपूर्ण कम्पोनेन्ट तथा कम संख्यामा उत्पादन हुने विशेष सवारीसाधनका लागि छुट्टै स्वीकृति प्रक्रिया विकास गर्ने तयारी पनि छ।

चीनले सवारीसाधन तथा ब्याट्री उत्पादन क्षमतामाथिको निगरानी बढाउने भएको छ। अत्यधिक लगानी नियन्त्रण, उद्योग एकीकरण तथा कमजोर उत्पादन क्षमताको अन्त्यलाई पनि नीतिको हिस्सा बनाइएको छ।

त्यस्तै, एकाधिकारविरोधी कारबाहीलाई बलियो बनाउने, उत्पादनको गुणस्तरमा निगरानी बढाउने र निष्पक्ष प्रतिस्पर्धालाई प्रोत्साहन गर्ने योजना छ। स्थानीय सरकारबाट दिइने अनुचित प्रोत्साहनलाई समेत नियन्त्रण गरिने मन्त्रालयले जनाएको छ।

चिनियाँ अटो कम्पनीहरूलाई विदेशमा विस्तार गर्दा नियम पालना गर्न सहयोग गर्ने दिशानिर्देश ल्याउने तयारीसमेत छ। चीनले स्वदेशी तथा विदेशी कम्पनीबीच सवारीसाधन र प्रमुख कम्पोनेन्टको अनुसन्धान, लगानी तथा विश्व बजार विस्तारमा थप सहकार्यलाई प्रोत्साहन गर्ने जनाएको छ।