काठमाडौं ।
अमेरिकी विद्युतीय सवारी निर्माता टेस्लाले आफ्नो स्वचालित रोबोट्याक्सी सेवा अन्तर्गतको ‘साइबरक्याब’ सार्वजनिक रूपमा सञ्चालनमा ल्याउने तयारी गरेको छ।
द इन्फर्मेसनले सोमबार सार्वजनिक गरेको रिपोर्टअनुसार टेस्लाले अगस्टमै टेक्सासको अस्टिनबाट साइबरक्याबको सार्वजनिक सडकमा परीक्षण तथा सञ्चालन सुरु गर्ने तयारी गरेको हो।
रिपोर्टअनुसार टेस्लाले सुरुमा आफ्ना कर्मचारीलाई सार्वजनिक सडकमा साइबरक्याबमा यात्रा गराउनेछ। त्यसको केही दिनपछि अस्टिनमा सञ्चालन भइरहेको रोबोट्याक्सी सेवामा साइबरक्याबलाई समावेश गर्ने कम्पनीको योजना छ।
साइबरक्याब टेस्लाले विशेष रूपमा स्वचालित सञ्चालनका लागि निर्माण गरेको सवारी हो। यसमा परम्परागत सवारीमा हुने स्टेयरिङ ह्विल र पेडलसमेत राखिएको छैन। टेस्लाको दीर्घकालीन रोबोट्याक्सी योजनामा यो सवारीलाई महत्वपूर्ण मानिएको रोयटर्सले उल्लेख गरेको छ।
रिपोर्टअनुसार कम्पनीले साइबरक्याब सार्वजनिक सञ्चालनका लागि पछिल्ला केही सातादेखि तयारी तीव्र बनाएको छ। यस क्रममा सवारी परीक्षण, निजी सडकमा कर्मचारीलाई साइबरक्याबमा यात्रा गराउने तथा स्थानीय आपत्कालीन प्रतिक्रिया टोलीसँग प्रशिक्षणसमेत गरिएको छ।
टेस्लाले साइबरक्याबको उत्पादन संस्करणको सार्वजनिक सडकमा परीक्षण भने जुनदेखि नै सुरु गरिसकेको छ। कम्पनीले सवारीको उत्पादन यस वर्षको पछिल्लो चरणमा क्रमशः बढाउने अपेक्षा गरिएको छ।
टेस्लाले अस्टिनमा साइबरक्याबको सञ्चालन सुरु गर्ने योजनाबारे तत्काल टिप्पणीका लागि गरिएको रोयटर्सको अनुरोधको जवाफ नदिएको रिपोर्टमा उल्लेख छ।
साइबरक्याब टेस्लाको स्वचालित सवारीसम्बन्धी महत्वाकांक्षाको महत्वपूर्ण हिस्सा हो। कम्पनीले भविष्यमा यस्ता सवारीलाई चालकविहीन राइड–हेलिङ सेवामा ठूलो मात्रामा प्रयोग गर्ने लक्ष्य राखेको छ।
प्रकाशित: ३ भाद्र २०८३, बुधबार
