Apple

एप्पलले आईओएस २७ मा फोटो प्रमाणीकरण टूल ल्याउन सक्ने

एप्पलले आईओएस २७ मा फोटो प्रमाणीकरण टूल ल्याउन सक्ने
फाइल तस्बिर
Global IME Bank

जेनेरेटिभ एआईको बढ्दो प्रयोगका बीच फोटो वास्तविक रूपमा कहाँबाट आएको हो भनेर प्रमाणित गर्ने नयाँ माध्यमका रूपमा एप्पलले रेफरेन्स इमेज नामक सुविधा ल्याउन सक्ने भएको छ।

आईओएस २७ सार्वजनिक हुँदा सिरीको नयाँ आर्टिफिसियल इन्टेलिजेन्स क्षमताहरू हेर्न प्रयोगकर्ताहरू उत्साहित छन्। यसैबीच एप्पलले थप टूलमा पनि काम गरिरहेको देखिएको छ।

पछिल्लो अपरेटिङ सिस्टमको बेटा संस्करणको विश्लेषण गर्दा ९टू५म्याकले एप्पलले फोटो प्रमाणीकरण सुविधामा काम गरिरहेको हुन सक्ने संकेत फेला पारेको जनाएको छ।

एप्पल रेफरेन्स इमेज आईफोनको क्यामेराबाट फोटो खिचिएको हो कि होइन भनेर प्रमाणित गर्ने उपकरण हुने देखिएको छ। कुनै फोटो आईफोनबाट खिचिएको हो भनेर पुष्टि गर्न फोटोको सेन्सरसम्बन्धी जानकारी र मेटाडेटा प्रमाणीकरणका लागि प्राइभेट क्लाउड कम्प्युटमा पठाउन सकिनेछ। यो प्रमाणीकरण सुविधा प्रयोग गर्न आईफोनको क्यामेरामा नयाँ रेफरेन्स मोड सक्रिय गर्नुपर्नेछ।

एआईबाट सिर्जना गरिएका नक्कली वा परिवर्तन गरिएका सामग्री बढिरहेको समयमा कुनै तस्बिरको स्रोत जाँच गर्ने उपकरणको आवश्यकता पहिलेभन्दा महत्वपूर्ण बनेको छ। हाल अधिकांश यस्ता उपकरणले एआईबाट सिर्जना गरिएका सामग्रीमा डिजिटल वाटरमार्क राख्ने तरिका अपनाएका छन्।

एप्पलको इमेज प्लेग्राउन्ड र कम्पनीले ल्याउन लागेका अन्य इमेज एडिटिङ सुविधामा पनि यस्तो प्रविधि प्रयोग हुन्छ। गुगलले पनि आफ्नो सिन्थआईडी एआई वाटरमार्किङ कार्यक्रम विस्तार गरिरहेको छ।

सामग्री कहाँबाट आएको हो भनेर पुष्टि गर्ने रेफरेन्स इमेजको यो तरिका मेटाडेटा र वाटरमार्किङमा आधारित प्रयासको उपयोगी विकल्प हुन सक्नेछ। यद्यपि यो सुविधा अहिले पनि बेटा परीक्षणकै क्रममा रहेकाले आईओएस २७ को सार्वजनिक संस्करणमा रेफरेन्स इमेज समावेश नहुन पनि सक्नेछ।

Sajilo Visa
easy care