आईफोन डुओमा फेस अनलक सुविधा थपिँदै, आईओएस २७.३ बिटा सार्वजनिक
काठमाडौं ।
एप्पलले आफ्नो फोल्ड गर्न मिल्ने स्मार्टफोन आईफोन डुओमा अनुहार पहिचानमार्फत फोन अनलक गर्न सकिने सुविधा थप गरेको छ। कम्पनीले सार्वजनिक गरेको आईओएस २७.३ को दोस्रो डेभलपर बिटा संस्करणमा यो सुविधा समावेश गरिएको हो।
नयाँ अपडेटसँगै आईफोन डुओको सेटिङमा रहेको ‘टच आईडी एन्ड पासकोड’ विकल्पभित्र ‘अनलक विथ फ्रन्ट क्यामेरा’ नामको नयाँ सुविधा थपिएको छ। यसले फोन फोल्ड गरिएको अवस्थामा पनि अगाडिको क्यामेरामार्फत अनुहार पहिचान गरी लक खोल्न सक्नेछ।
तर यो फेस अनलक सुविधा लक स्क्रिनमा मात्र सीमित हुनेछ। यसबाट एप्पल पेबाट भुक्तानी गर्दा वा सेभ गरिएका पासवर्ड खोल्दा प्रमाणीकरण गर्न मिल्ने छैन। त्यस्तै, फोन ४५ मिनेटसम्म प्रयोग नगरेको अवस्थामा फेस अनलक प्रयोग गर्नुअघि टच आईडीबाट प्रमाणीकरण गर्नुपर्ने व्यवस्था राखिएको छ।
आईओएस २७.३ बिटा २ मा ‘क्लोज टु लक’ नामको अर्को विकल्प पनि थपिएको छ। यो सुविधा सक्रिय गरेपछि फोन फोल्ड गर्दा कभर स्क्रिनमा सामग्री सार्नुको सट्टा डिभाइस स्वतः लक हुनेछ।
जीएसएमएरिनाका अनुसार यस अपडेटमा एप्पल इन्टेलिजेन्स र सिरी एआईको प्रयोग सीमा निर्धारण गर्ने नयाँ विकल्प, सिरीका लागि ‘आस्क अबाउट पेज’ सुविधा तथा केही अन्य सुधार पनि समावेश छन्।
एप्पलले यसअघि यसै महिनाको सुरुवातमा आईओएस २७.३ को पहिलो डेभलपर बिटा सार्वजनिक गरेको थियो। दोस्रो बिटामा थपिएका सुविधाहरू हाल डेभलपर परीक्षणका लागि उपलब्ध छन्।