काठमाडौं ।
स्न्यापले आफ्नो नयाँ अग्मेन्टेड रियालिटी अर्थात् एआर चस्मा स्पेक्स सार्वजनिक रूपमा प्रदर्शन गर्न सेप्टेम्बर १६ मा विशेष कार्यक्रम आयोजना गर्ने भएको छ। कार्यक्रम अमेरिकी समयअनुसार साँझ ७ बजे लस एन्जलसमा हुनेछ र यसको प्रत्यक्ष प्रसारण पनि गरिनेछ।
कम्पनीले २,१९५ अमेरिकी डलर मूल्यको स्पेक्सबारे पहिलो पटक विस्तृत जानकारी यही कार्यक्रममा दिने जनाएको छ।
स्न्यापका प्रमुख कार्यकारी अधिकृत इभान स्पिगेलले कार्यक्रममा स्पेक्सको प्रदर्शन गर्दै यसले एआई सहायक, कार्यसम्बन्धी उपकरण, मनोरञ्जन र साझा अनुभवलाई वास्तविक वातावरणसँग कसरी जोड्छ भन्ने देखाउने कम्पनीले जनाएको छ। उनका अनुसार यसले प्रयोगकर्तालाई आफ्नो वरिपरिको वातावरणसँग जोडिएर सिर्जना गर्न, सम्पर्क गर्न, सिक्न र काम गर्न सहयोग गर्नेछ।
इन्ग्याजेटका अनुसार स्न्यापले गत महिना स्पेक्सको प्रि-अर्डर खुला गरेको थियो। कम्पनीका अनुसार यो एआरचस्मा आगामी शरद ऋतुमा अमेरिका, बेलायत र फ्रान्समा पठाउन सुरु गरिनेछ। कार्यक्रमका क्रममा वितरण सुरु हुने निश्चित मिति पनि सार्वजनिक हुने अपेक्षा गरिएको छ।
स्पेक्स ४७ मिमि र ५२ मिमि गरी दुई आकारमा उपलब्ध हुनेछ। कम्पनीका अनुसार यसको ब्याट्रीले मिश्रित प्रयोगमा चार घण्टासम्म साथ दिनेछ।
स्पेक्समा इनबिल्ट वेब ब्राउजर र एआई सुविधा समावेश गरिएको छ। यसका लागि स्न्यापले ओपनएआई र गुगलसँग सहकार्य गरेको छ। यसमा खेलसहित सयौं एआर लेन्स अर्थात् एपहरू उपलब्ध हुनेछन्।
स्पेक्सको बाक्लो फ्रेमभित्र क्वालकमका दुईवटा स्न्यापड्रागन प्रोसेसर राखिएका छन्। तीमध्ये एउटा कम्प्युटर भिजनका लागि र अर्को एआर एपहरू सञ्चालनका लागि प्रयोग हुने कम्पनीले जनाएको छ।
प्रकाशित: १७ श्रावण २०८३, आईतवार
