काठमाडौं ।
एप्पलले पहिलो पटक बजार मूल्यका आधारमा ५ ट्रिलियन डलरको सीमा पार गरेको छ। यससँगै यो मूल्यांकनमा पुग्ने विश्वको दोस्रो कम्पनी बनेको छ।
रोयटर्सका अनुसार कारोबारका क्रममा एप्पलको शेयर मूल्य ३४२.८९ डलरसम्म पुगेपछि कम्पनीको कुल बजार मूल्य करिब ५.०३६ ट्रिलियन डलर पुगेको थियो। यद्यपि कारोबार बन्द हुँदा शेयर मूल्य केही घटेर कम्पनीको बजार मूल्य करिब ४.९६ ट्रिलियन डलरमा सीमित भयो। एप्पलअघि एनभिडिया ५ ट्रिलियन डलरको बजार मूल्य पार गर्ने पहिलो कम्पनी बनेको थियो।
एप्पलको बजार मूल्य वृद्धि लगानीकर्ताहरू अन्य प्रविधि कम्पनीहरूले डाटा सेन्टर निर्माण र कृत्रिम बुद्धिमत्ता (एआई) मोडेल विकासमा गरिरहेको ठूलो खर्चप्रति सावधानी अपनाउन थालेका समयमा भएको हो।
टेलिग्राफका अनुसार केही प्रतिस्पर्धी कम्पनीहरूभन्दा फरक रूपमा एप्पलले आफ्नै सम्पूर्ण एआई पूर्वाधार निर्माण गर्ने रणनीति नअपनाई गुगलका प्रविधिलाई आफ्नो एआई रणनीतिमा समावेश गरेको छ।
कम्पनीका उत्पादनप्रतिको स्थिर माग, आईफोनको मूल्य स्थिर रहनु तथा अमेरिकामा उपकरण खरिदका लागि सुरु गरिएको नयाँ मासिक किस्ता कार्यक्रमले लगानीकर्ताको विश्वास बढाउन सहयोग गरेको छ। सन् २०२६ मा एप्पलको शेयर मूल्य करिब २४ प्रतिशतले बढिसकेको छ।
विश्लेषकहरूले एप्पलले चालु त्रैमासिकमा बलियो आम्दानी वृद्धि सार्वजनिक गर्ने अपेक्षा गरेका छन्। तर शेयर बजारको मूल्यांकन छिट्टै परिवर्तन हुन सक्ने भएकाले ५ ट्रिलियन डलरको सीमा पार गर्नुले कम्पनीले सधैं यही स्तरको बजार मूल्य कायम राख्ने सुनिश्चितता भने नदिने उनीहरूको भनाइ छ।
प्रकाशित: १५ श्रावण २०८३, शुक्रबार
