काठमाडौं ।
ओपनएआईले लामो समयदेखि प्रतिक्षा गरिएको ‘सुपर एप’ सार्वजनिक गरेको छ। यसले कार्यालयमा काम गर्ने कर्मचारीहरूलाई महँगो कोडिङ उपकरण प्रयोग नगरी एआईको कोडिङ क्षमता उपयोग गर्न सहयोग गर्ने कम्पनीले जनाएको छ।
‘च्याटजीपीटी वर्क’ नाम दिइएको नयाँ एआई एजेन्टले ओपनएआईको लोकप्रिय च्याटबट च्याटजीपीटीलाई यसको एआई कोडिङ उपकरण ‘कोडेक्स’सँग संयोजन गरेको छ। कम्पनीका अनुसार यसले कागजात, प्रस्तुति र वेबसाइट तयार गर्न सक्छ। यो सेवा ओपनएआईको सबैभन्दा उन्नत एआई मोडेल जीपीटी–५.६ मा आधारित छ, जसको पनि बिहीबार सार्वजनिक गरिएको हो।
अमेरिकी सरकारको राष्ट्रिय सुरक्षा सम्बन्धी चिन्ताका कारण जीपीटी–५.६ को सार्वजनिक घोषणा गत महिना स्थगित गरिएको थियो।
रोयटर्सका अनुसार च्याटजीपीटी वर्क ओपनएआईको प्रतिद्वन्द्वी एन्थ्रोपिकले जनवरीमा सार्वजनिक गरेको ‘क्लाउड काउवर्क’को प्रत्यक्ष प्रतिस्पर्धी हो। उक्त एआई एजेन्टले धेरै चरणका कामहरू आफैं योजना बनाएर पूरा गर्न सक्छ।
यो सार्वजनिकसँगै व्यावसायिक प्रयोगका लागि एआई उपकरण विकास र बिक्रीमा प्रतिस्पर्धा अझ तीव्र भएको देखिएको छ। न्यून मानवीय हस्तक्षेपमै जटिल काम गर्न सक्ने स्वायत्त एआई एजेन्टहरूको माग बढ्दै जाँदा प्रविधि कम्पनीहरूले त्यसको फाइदा उठाउने प्रयास गरिरहेका छन्।
निकट भविष्यमा शेयर बजारमा सूचीकृत हुने तयारीमा रहेका ओपनएआई र एन्थ्रोपिक उपभोक्ताभन्दा बढी आम्दानी हुने उद्यम क्षेत्रका ग्राहक आकर्षित गर्न प्रतिस्पर्धामा छन्।
च्याटजीपीटी वर्क र क्लाउड काउवर्क दुवै कोडिङ नजान्ने प्रयोगकर्तालाई पनि एआई कोडिङ उपकरणको क्षमता प्रयोग गर्न मिल्ने गरी बनाइएका हुन्। यस्ता उपकरण सामान्य च्याटबटभन्दा बढी सक्षम भए पनि प्रायः विशेष ज्ञान आवश्यक पर्छ।
ओपनएआईका अधिकारीहरूले आफ्नो नयाँ सेवा प्रतिस्पर्धी उत्पादनभन्दा सस्तो र धेरै प्रयोगकर्ताका लागि उपलब्ध हुने बताएका छन्। कम्पनीले जीपीटी–५.६ का तीन फरक आकारका संस्करण पनि सार्वजनिक गरेको छ।
च्याटजीपीटी वर्कका उत्पादन प्रबन्धक टाइ गेरीले जीपीटी–५.६ को कोडिङ क्षमता विभिन्न उद्योगका समस्या समाधानमा प्रयोग गर्न सकिने बताए। उनका अनुसार यो मोडेल धेरै महँगा मोडेलसँग प्रतिस्पर्धा गर्न सक्ने, दुई गुणा छिटो र निकै सस्तो छ।
बिहीबारको घोषणाले यस्ता एआई उपकरण प्रयोग गर्दा लाग्ने उच्च लागतबारे कम्पनीहरूको बढ्दो चिन्ता पनि देखाएको छ।
कन्सल्टिङ कम्पनी क्रिएटिभ स्ट्राटेजिजका विश्लेषक म्याक्स वाइनबाखका अनुसार ओपनएआईको नयाँ मोडेलको सबैभन्दा सानो संस्करणले सबैभन्दा ठूलो संस्करणसरह काम गर्न सक्छ, तर यसको लागत केवल पाँचौं भाग मात्र पर्छ।
यसअघि ओपनएआईका एआई एजेन्ट सेवामा ‘अपरेटर’ र ‘डीप रिसर्च’ समावेश थिए, जसलाई पछि व्यक्तिगत प्रयोगकर्ताका लागि ‘च्याटजीपीटी एजेन्ट’मा समेटिएको थियो। कम्पनीसँग उद्यमका कार्यप्रवाह स्वचालनका लागि ‘वर्कस्पेस एजेन्ट्स’ पनि उपलब्ध छन्।
च्याटजीपीटी वर्क बिहीबारदेखि वेब र मोबाइलमा उपलब्ध हुनेछ। सुरुमा यो प्रो, इन्टरप्राइज र एजु प्रयोगकर्ताले प्रयोग गर्न पाउनेछन् भने आगामी केही दिनमा प्लस र बिजनेस प्रयोगकर्ताका लागि पनि विस्तार गरिनेछ।
ओपनएआईले नयाँ च्याटजीपीटी डेस्कटप एप्लिकेसन र च्याटजीपीटी वर्कमार्फत सिधै वेबसाइट बनाउन तथा साझा गर्न मिल्ने ‘होस्टेड वेबसाइट्स’ सुविधा पनि सार्वजनिक गरेको छ।
प्रकाशित: २६ असार २०८३, शुक्रबार
