स्विडेनको टेलिकम परीक्षण केन्द्रमा एरिक्सन र साझेदारहरूले ३१ मिलियन अमेरिकी डलर लगानी गरे

काठमाडौं ।

एरिक्सन र साझेदारहरूले स्विडेनको टेलिकम परीक्षण केन्द्रमा ३१ मिलियन अमेरिकी डलर लगानी गरेका छन्

स्विडेनमा राष्ट्रिय टेलिकम परीक्षण केन्द्र स्थापना हुने भएको छ, जसले उद्योगहरूलाई नवीनतम फाइभजी र सिक्सजी प्रविधि परीक्षण गर्ने अवसर प्रदान गर्नेछ।

घोषणामा कृत्रिम बुद्धिमत्ता (एआई) लाई पनि प्रमुख रूपमा समावेश गरिएको छ।

३० करोड स्विडिस क्रोनर (करिब ३१ मिलियन अमेरिकी डलर) लागतको यो केन्द्रलाई ‘डिजिटल एरिना स्विडेन’ नाम दिइएको छ। यसले खानी, यातायात, रक्षा र चिकित्सा प्रविधि (मेडटेक) लगायत विभिन्न क्षेत्रलाई यी प्रविधिहरूको सम्भावना अध्ययन गर्न सहयोग गर्नेछ।

एरिक्सनका अनुसार डिजिटल एरिना स्विडेनले साझा डिजिटल पोर्टल र परीक्षणका लागि साझा ढाँचा कार्यान्वयन गर्नेछ। यसले उन्नत प्रविधिमा पहुँच बढाउँदै स्विडेनको नवप्रवर्तन प्रणालीलाई अवधारणादेखि व्यावसायिक प्रयोगसम्मको मार्ग निर्माण गर्न सहयोग गर्नेछ।

टेलिकम्स डटकमका अनुसार यो परियोजना एरिक्सन र टेलियासहित विभिन्न साझेदारहरूको सहकार्यमा सञ्चालन हुनेछ। सहभागी संस्थाहरूमा स्विडेनको सरकारी स्वामित्वको अनुसन्धान संस्था आरआईएसई, यसको सहायक संस्था आस्टाजेरो तथा ‘फ्युचर बाइ लुन्ड’ नामक परामर्श कम्पनी पनि रहेका छन्।

यस प्रयासलाई स्विडेन सरकारको अनुसन्धान तथा विकास निकाय भिन्नोभाले आफ्नो ‘अभान्सेराड डिजिटालिसेरिङ’ नवप्रवर्तन कार्यक्रममार्फत समर्थन गरेको छ।

एरिक्सनको भूमिका व्यावसायिक प्रयोगअघि परीक्षण गर्न सकिने ६जी वातावरण स्थापना गर्नु हो। यसका लागि उसले लुन्ड विश्वविद्यालय र केटीएच रोयल इन्स्टिच्युट अफ टेक्नोलोजीसँग सहकार्य गर्नेछ।

“स्विडेनमा प्रविधिगत नेतृत्व कायम राख्ने लामो अनुभव छ। प्रविधि व्यावसायिक रूपमा उपलब्ध हुनुभन्दा धेरै वर्षअघि नै ५जी, ६जी र एआईको संयोजनका लागि विश्वकै प्रारम्भिक परीक्षण वातावरणमध्ये एक निर्माण गरेर हामी स्विडेनको उद्योग र अनुसन्धानलाई अग्रपंक्तिमा राखिरहेका छौं,” एरिक्सनका प्रमुख प्रविधि अधिकृत एरिक एकुडेनले भने।

उनले थपे, “एरिक्सनका लागि यो साझेदारहरूसँग मिलेर एआई एजेन्ट, फिजिकल एआई (रोबोटिक्स) र स्वायत्त प्रणालीहरू विकास तथा परीक्षण गर्न सकिने भविष्यको कनेक्टेड समाज कसरी सञ्चालन हुनेछ भन्ने परिभाषित गर्ने अवसर हो।”

यो केन्द्रको उद्घाटन स्विडेनको गोटल्यान्ड टापुमा हुने वार्षिक अल्मेडालेन कार्यक्रममा गरिएको हो। एक सातासम्म चल्ने यस कार्यक्रममा विभिन्न समूह र सर्वसाधारणले सामाजिक तथा राजनीतिक विषयमा छलफल गर्छन्। साथै, एरिक्सन र उसका साझेदारहरूले देशमा भइरहेका नवीनतम प्रविधिगत विकास प्रदर्शन गर्ने अवसर पनि पाउँछन्।

“नयाँ परीक्षण केन्द्रमार्फत हामी थप कम्पनीहरूलाई नवीनतम ५जी प्रविधि र एआईमा सहभागी हुन अवसर दिइरहेका छौं, जहाँ सुरक्षा र सार्वभौमिकतासम्बन्धी उच्च आवश्यकताहरू पूरा गर्न सकिन्छ,” टेलिया स्विडेनका प्रमुख कार्यकारी अधिकृत एन्डर्स ओल्सनले भने। “महत्त्वपूर्ण सञ्चालन र उत्पादनलाई जडान तथा डिजिटाइज गर्न यो आवश्यक छ। साथै, कार्यक्षमता, ग्राहक मूल्य र सामाजिक लाभका हिसाबले सबैभन्दा बढी मूल्य सिर्जना हुने क्षेत्र पनि यही हो। यसले स्विडेनको डिजिटल सुरक्षा र प्रतिस्पर्धात्मकता सुदृढ गर्ने प्रयासलाई थप गति दिनेछ।”

एरिक्सनको पछिल्लो मोबिलिटी रिपोर्टअनुसार विश्वभर हाल ९० भन्दा बढी ५जी स्ट्यान्डअलोन (एसए) नेटवर्क व्यावसायिक सेवामा छन्। साथै, दशकको अन्त्यअघि नै पूर्व-व्यावसायिक ६जी सञ्चालनमा ल्याउने प्रयास पनि तीव्र रूपमा अघि बढिरहेको छ। त्यसैले एरिक्सन र उसका साझेदारहरूले यी प्रविधिप्रति जागरूकता र प्रयोग बढाउन लाखौं डलर लगानी गर्नु स्वाभाविक मानिएको छ।