काठमाडौं ।
एप्पलले सोमबार कुनै ठूलो घोषणा नगरी शान्त रूपमा एयरपड्स म्याक्स २ सार्वजनिक गरेको छ। यो कम्पनीले सन् २०२० मा ल्याएको प्रिमियम हेडफोनको उत्तराधिकारी हो।
म्याक्स २ को मूल्य ५४९ डलर तोकिएको छ। यसमा एक्टिभ न्वाइज क्यान्सिलेशन, एप्पलको अडियोका लागि विशेष एच२ चिप, लाइभ ट्रान्सलेशन सपोर्ट, सुधारिएको ध्वनि गुणस्तर लगायतका फिचर छन्। हेडफोनको प्रि-अर्डर मार्च २५ देखि सुरु हुनेछ र यो मिडनाइट, स्टारलाइट, अरेञ्ज, पर्पल र नीलो रंगमा उपलब्ध हुनेछ। बिक्री भने अर्को महिनाको सुरुतिर सुरु हुने बताइएको छ।
एप्पलका अनुसार नयाँ हेडफोनको एक्टिभ न्वाइज क्यान्सिलेशन (एएनसी) अघिल्लो मोडलभन्दा १.५ गुणासम्म प्रभावकारी छ। साथै एडप्टिभ अडियो फिचरले प्रयोगकर्ताको वरिपरिको वातावरण अनुसार एएनसी र ट्रान्सपरेन्सी अर्थात् पारदर्शिताको स्तर स्वचालित रूपमा समायोजन गरेर सुन्ने अनुभवलाई राम्रो बनाउँछ।
कम्पनीका अनुसार ट्रान्सपरेन्सी मोड पनि अहिले अझ प्राकृतिक बनेको छ। यसको लागि एच२ चिप र एयरपड्स म्याक्सको माइक्रोफोन प्रणालीका लागि अनुकूल बनाइएको नयाँ डिजिटल सिग्नल-प्रोसेसिङ अल्गोरिदम प्रयोग गरिएको छ, जसले प्रयोगकर्तालाई वरिपरिको वातावरण र मानिसहरूको आवाज सजिलै सुन्न मद्दत गर्छ।
हेडफोनमा लाइभ ट्रान्सलेशन फिचर पनि छ, जसले फरक भाषा बोल्ने मानिसहरूसँग प्रत्यक्ष संवाद गर्न सहयोग गर्छ। यसमा भ्वाइस आइसोलेशन फिचर पनि छ, जसले “एडभान्स्ड कम्प्युटेशनल अडियो” प्रयोग गरेर फोन कलका बेला प्रयोगकर्ताको आवाजलाई प्राथमिकता दिन्छ र वरिपरिको आवाजलाई कम गर्छ।
एप्पलका अनुसार एयरपड्स म्याक्स २ मा नयाँ हाइ-डाइनामिक रेञ्ज एम्प्लिफायर प्रयोग गरिएको छ, जसले अझ सफा अडियो दिन्छ। स्पाटियल अडियो पनि सुधारिएको बताइएको छ, जसमा वाद्यवादनको स्थान पहिचान, बास प्रतिक्रिया र मध्यम तथा उच्च अझ प्राकृतिक बनेका छन्।
हेडफोनले क्यामरा रिमोट फिचर पनि सपोर्ट गर्छ, जसले प्रयोगकर्तालाई टाढाबाटै आईफोन वा आईप्याडको क्यामरा चलाउन अनुमति दिन्छ। म्याक्स २ मा डिजिटल क्राउन थिचेर फोटो खिच्न वा क्यामरा एप तथा मिल्ने तेस्रो पक्षका क्यामरा एपहरूमा भिडियो रेकर्ड सुरु वा बन्द गर्न सकिन्छ।
एप्पलका अनुसार हेडफोनमा रहेको लाउड साउण्ड रिडक्शन फिचरले वरिपरिको ठूलो आवाजबाट प्रयोगकर्तालाई जोगाउन मद्दत गर्छ र उनीहरूले सुनिरहेको अडियोको मूल ध्वनि गुणस्तर पनि कायम राख्छ। कम्पनीले हेडफोनको माइक्रोफोनले अन्तर्वार्ता लिने व्यक्ति, पोडकास्टर, गायक तथा अन्य सिर्जनाकर्ताहरूलाई उच्च गुणस्तरको अडियो र बढी प्राकृतिक आवाजसहित सामग्री रेकर्ड गर्न मद्दत गर्ने बताएको छ।
प्रकाशित: ३ चैत्र २०८२, मंगलवार
