काठमाडौं ।
एनभिडियाले ओपनएआई तथा अन्य ग्राहकहरूलाई छिटो र प्रभावकारी एआई प्रणाली निर्माण गर्न सहयोग गर्ने उद्देश्यले नयाँ प्रोसेसर सार्वजनिक गर्ने योजना बनाएको छ। द वाल स्ट्रीट जर्नलले शुक्रबार यस विषयमा जानकार स्रोतहरूलाई उद्धृत गर्दै जनाएको छ।
रिपोर्टका अनुसार एनभिडियाले “इन्फरेन्स” कम्प्युटिङका लागि नयाँ प्रणाली विकास गरिरहेको छ। इन्फरेन्स कम्प्युटिङ यस्तो प्रकारको प्रशोधन हो जसले एआई मोडेलहरूलाई प्रयोगकर्ताका प्रश्नहरूको जवाफ दिन सक्षम बनाउँछ।
रिपोर्टमा थप उल्लेख गरिएअनुसार नयाँ प्लेटफर्म आगामी महिना सान होजेमा आयोजना हुने एनभिडियाको जीटीसी डेभलपर सम्मेलनमा सार्वजनिक गरिनेछ। उक्त प्रणालीमा स्टार्टअप ग्रोकले डिजाइन गरेको चिप समावेश हुने बताइएको छ।
उक्त रिपोर्ट तत्काल स्वतन्त्र रूपमा पुष्टि गर्न नसकेको रोयटर्सले उल्लेख गरेको छ। एनभिडिया र ओपनएआईले रोयटर्सले पनि तत्काल प्रतिक्रिया जनाएनन्।
यसै महिनाको सुरुमा रोयटर्सले ओपनएआई एनभिडियाको हार्डवेयरको गतिप्रति सन्तुष्ट नभएको जनाएको थियो। विशेष गरी सफ्टवेयर विकास जस्ता समस्याहरू तथा एआईले अन्य सफ्टवेयरसँग संवाद गर्ने प्रक्रियामा च्याटजीपीटी प्रयोगकर्ताहरूलाई जवाफ दिन लाग्ने समयप्रति असन्तुष्टि रहेको उल्लेख गरिएको थियो।
एक स्रोतका अनुसार, भविष्यमा ओपनएआईको इन्फरेन्स कम्प्युटिङ आवश्यकताको करिब १० प्रतिशत पूरा गर्न सक्ने नयाँ हार्डवेयर आवश्यक पर्ने बताइएको छ।
च्याटजीपीटी निर्माणकर्ता ओपनएआईले छिटो इन्फरेन्सका लागि चिप उपलब्ध गराउन सेरेब्रास र ग्रोक जस्ता स्टार्टअपहरूसँग सहकार्य गर्नेबारे छलफल गरेको दुई स्रोतले बताएका छन्। तर, एक स्रोतका अनुसार एनभिडियाले ग्रोकसँग २० अर्ब डलरको लाइसेन्स सम्झौता गरेपछि ओपनएआईसँगको वार्ता रोकिएको थियो।
सेप्टेम्बरमा एनभिडियाले ओपनएआईमा १०० अर्ब डलरसम्म लगानी गर्ने मनसाय व्यक्त गरेको थियो। उक्त सम्झौताअनुसार चिप निर्माता कम्पनीले स्टार्टअपमा हिस्सेदारी प्राप्त गर्नेछ भने ओपनएआईले उन्नत चिप खरिद गर्न आवश्यक नगद प्राप्त गर्नेछ।
प्रकाशित: १८ फाल्गुन २०८२, सोमबार
