च्याटजिपिटीले सुरु गर्यो आफ्नै एप स्टोर

काठमाडौं ।

च्याटजिपिटीले एप स्टोर सुरु गरेको छ र डेभलपरहरूलाई आफ्ना एप सार्वजनिक गर्न खुला रहेको जानकारी दिएको छ। ओपनएआईले बुधबार च्याटजिपिटीमा आफ्ना कार्यक्रम सुरु गर्न चाहने एप डेभलपरहरूले अब समीक्षा र सम्भावित प्रकाशनका लागि एप बुझाउन सक्ने जनाएको छ। कम्पनीले च्याटको टुल्स मेनुमा नयाँ एप डाइरेक्टरी पनि सुरु गरेको छ, जसलाई छिट्टै “एप स्टोर” भनेर चिनिन थालिएको छ।

टेकक्रञ्चका अनुसार अक्टोबरमा कम्पनीले आफ्ना च्याटबोटमा एपहरू थपिने घोषणा गरेको थियो। यसले च्याटजिपिटी प्रयोगकर्तालाई थप क्षमताहरू उपलब्ध गराउने ओपनएआईले बताएको थियो। त्यस क्रममा एक्स्पिडिया, स्पोटिफाइ, जिलोज र क्यान्भाजस्ता ठूला प्लेटफर्महरूले च्याट कुराकानीकै माध्यमबाट आफ्ना सेवा प्रयोग गर्न सकिने एकीकरण घोषणा गरेका थिए। अब कम्पनीले अझ धेरै डेभलपरहरूका लागि ढोका खोलेको छ।

“एपहरूले नयाँ सन्दर्भ ल्याएर च्याटजिपिटीका कुराकानीलाई विस्तार गर्छन् र प्रयोगकर्तालाई किराना अर्डर गर्ने, रूपरेखालाई स्लाइड डेकमा रूपान्तरण गर्ने वा अपार्टमेन्ट खोज्ने जस्ता काम गर्न सक्षम बनाउँछन्,” कम्पनीले बुधबार जनाएको छ।

ओपनएआईको एप्स एसडीके हाल बिटा अवस्थामा छ र यसले च्याटजिपिटी प्रयोगकर्ताका लागि नयाँ अनुभव सिर्जना गर्न चाहने डेभलपरलाई आवश्यक उपकरण उपलब्ध गराउँछ। डेभलपरहरू तयार भएपछि उनीहरूले ओपनएआई डेभलपर प्लेटफर्ममार्फत आफ्ना एप बुझाउन सक्नेछन्, जहाँ एपको स्वीकृति स्थिति ट्र्याक गर्न सकिने कम्पनीले जनाएको छ। स्वीकृत भएका केही एपहरू आउँदो वर्षभित्रै च्याटजिपिटीमा सुरु गरिने पनि कम्पनीले बताएको छ।

यो कदम च्याटजिपिटीभित्र एप इकोसिस्टम विस्तार गर्ने र प्रयोगकर्तालाई एप प्रयोग गर्न तथा त्यसमा टिकाइराख्न थप कारण दिने दिशामा ओपनएआईका लागि महत्वपूर्ण मानिएको छ।