अन्तरिक्ष अनुसन्धानमा अमेरिकी प्रविधिको नयाँ चरण : पुनःआपूर्ति यानले सामग्री पुर्‍यायो

काठमाडौं ।

अमेरिकी अन्तरिक्ष प्रविधि कम्पनी ‘नर्थर्प ग्रुम्यान’ले विकसित गरेको
आपूर्ति यान ‘सिग्नस एक्सएल’ बिहीबार अन्तर्राष्ट्रिय अन्तरिक्ष स्टेशन (आईएसएस) मा सफलतापूर्वक जोडिएको छ।

यसले आईएसएसमा आवश्यक पर्ने महत्वपूर्ण वैज्ञानिक उपकरण र अन्य सामाग्रीहरू पुर्‍याएको छ, जसले अन्तरिक्ष अनुसन्धान र प्रयोगशालाका कार्यहरूलाई सहज बनाउन ठूलो सहयोग गर्नेछ ।

‘सिग्नस एक्सएल’ अमेरिकी अन्तरिक्ष प्रविधि कम्पनी नर्थरप ग्रुम्यानद्वारा विकसित उन्नत पुनःआपूर्ति यान हो, जुन अन्तर्राष्ट्रिय अन्तरिक्ष स्टेशन (आईएसएस) मा वैज्ञानिक उपकरण, खाद्यान्न र अन्य आवश्यक सामग्री पुर्‍याउन प्रयोग गरिन्छ।

यो यान विशेष गरी ठूलो क्षमताको कार्गो बोकेर अन्तरिक्ष स्टेशनमा आपूर्ति गर्ने उद्देश्यले तयार गरिएको हो र यसले अन्तरिक्ष अनुसन्धान र प्रयोगशालाका गतिविधिहरूलाई निरन्तरता दिन महत्वपूर्ण भूमिका खेल्दछ। यसमा नवीनतम प्रविधिहरू समावेश छन्, जसले यसको विश्वसनीयता र कार्यक्षमता सुनिश्चित गर्दछ।

सिग्नस एक्सएल यान आइतबार अमेरिकी फ्लोरिडास्थित केप क्यानाभरल स्पेस फोर्स स्टेशनबाट स्पेसएक्सको फाल्कन ९ रकेटमार्फत प्रक्षेपण गरिएको थियो।

यो मिशन नर्थर्प ग्रुम्यानको कमर्शियल रिसप्लाइ सर्भिसेस २३ अन्तर्गत सञ्चालन गरिएको हो, जसले करिब ११ हजार पाउन्ड (लगभग ५ हजार किलोग्राम) वैज्ञानिक उपकरण, अनुसन्धान सामग्री र दैनिक प्रयोगका वस्तुहरू आईएसएसमा पुर्‍याउने लक्ष्य राखेको थियो।

प्रारम्भमा सिग्नस एक्सएल यान बुधबार आईएसएसमा पुग्ने योजना बनाइएको थियो, तर मुख्य इन्जिनमा देखिएको प्राविधिक समस्याका कारण यो योजना एक दिन ढिलो हुँदै बिहीबार आईएसएसमा पुग्न सफल भयो। बिहान ७ बजेर २४ मिनेट (स्थानिय समय अनुसार) अन्तरिक्ष स्टेशनका अन्तरिक्षयात्रीहरूले रोबोटिक हातको मद्दतले यानलाई समाते। त्यसपछि केही घण्टाको प्रक्रियापछि, बिहान १० बजेर १० मिनेटमा यसलाई सफलतापूर्वक अन्तरिक्ष स्टेशनसँग जोडिएको नासाले पुष्टि गर्‍यो।

यो यानले पुर्‍याएका सामग्रीहरू अन्तरिक्षमा भइरहेका विभिन्न वैज्ञानिक अनुसन्धानहरूका लागि अत्यन्त महत्वपूर्ण मानिन्छन्। यसले अन्तरिक्ष स्टेशनमा रहेका वैज्ञानिकहरूलाई उनीहरूको अनुसन्धानलाई निरन्तरता दिन र अन्तरिक्षका थप रहस्यमय पक्षहरूबारे नयाँ ज्ञान हासिल गर्न सहयोग गर्नेछ।

नर्थरप ग्रुम्यान र नासाबीचको यो साझेदारी अन्तरिक्ष अनुसन्धान र अन्तरिक्षयान आपूर्ति प्रणालीमा नयाँ सफलताको रूपमा लिइएको छ, जसले अन्तरिक्ष अन्वेषणलाई अझ प्रभावकारी र दिगो बनाउन महत्वपूर्ण भूमिका निर्वाह गर्ने अपेक्षा गरिएको छ।-रासस