Technology Khabar २८ भाद्र २०८२, शनिबार
काठमाडौं ।
क्रिप्टोकरेन्सी कम्पनी जेमिनी स्पेस स्टेशनले बिहीबार प्रारम्भिक सार्वजनिक प्रस्ताव (आईपीओ) मार्फत ४२५ मिलियन डलर संकलन गरेको छ। कम्पनीले आफ्नो सेयर मूल्य बजारमा तय गरिएको दायराभन्दा माथि राख्दै प्रति सेयर २८ डलरमा करिब १ करोड ५२ लाख सेयर बिक्री गरेको जनाएको छ। यो सेयर मूल्य प्रति सेयर २४ देखि २६ डलरको दायराभन्दा बढी हो।
आईपीओपछि जेमिनीको मूल्यांकन ३.३३ अर्ब डलर पुगेको रोयटर्सको गणनामा देखाइएको छ। यसअघि सेयर मूल्य दायरा १७ देखि १९ डलर राखिएकोमा यस हप्ताको सुरुवातमै बढाइएको थियो, जसले लगानीकर्ताको उच्च मागलाई देखाएको हो।
न्यूयोर्कस्थित कम्पनीले संकलन रकम ४२५ मिलियन डलरमै सीमित गर्ने दुर्लभ निर्णय लिएको थियो। रोयटर्सका अनुसार माग उपलब्ध सेयरभन्दा २० गुणाभन्दा बढी थियो।
रोयटर्सका अनुसार डिजिटल सम्पत्तिको उच्च मूल्य र नियामकीय प्रगतिले पहिले समस्याग्रस्त रहेको क्रिप्टो क्षेत्रलाई फेरि आईपीओ बजारको प्रमुख आधार बनाएको छ। यस शरद ऋतुमा अमेरिकाको ट्यारिफका कारण अप्रिलमा रोकिएका सूचीकरण योजना फेरि अघि बढेका छन्।
आईपीओको समयमा नै नासड्याकले निजी प्लेसमेन्टमार्फत ५० मिलियन डलर लगानी गर्ने घोषणा गरेको थियो। रोयटर्सले यसबारे पहिलो पटक रिपोर्ट गरेको हो। जेमिनीको सेयर शुक्रबारदेखि नासडाकमा “जीईएमआई” टिकरसहित कारोबार हुने छ।
यसअघि बुधबार स्टेबलकोइन जारीकर्ता फिगर टेक्नोलोजीले अमेरिकामा आईपीओमार्फत ७८७.५ मिलियन डलर संकलन गरेको थियो। यस वर्षको सुरुवातमै कोइनडेस्क मालिक बुलिश र स्टेबलकोइन जारीकर्ता सर्कलले पनि आफ्ना प्रस्तावहरू बढाएका थिए।
राष्ट्रपति डोनाल्ड ट्रम्पको कार्यकालमा अमेरिकी सेयर तथा विनिमय आयोग (एसईसी) ले क्रिप्टो क्षेत्रमा नियमनलाई केही सहज बनाएको छ। यसबाट जेमिनी पनि लाभान्वित भएको छ।
विन्कलभस ट्विन्सले गत अप्रिलमा खुद्रा लगानीकर्तालाई प्रस्ताव गर्नु अघि क्रिप्टो सम्पत्ति ऋण कार्यक्रम दर्ता नगरेको आरोपमा दायर मुद्दा समाधानतर्फ अगाडि बढाएका थिए। तर, यो मुद्दा अझै समाधान भएको छैन। दुवै पक्षको प्रतिवेदन सेप्टेम्बर १५ मा पेश गर्नुपर्नेछ।
यसैबीच, ट्रम्प प्रशासन अन्तर्गत कमोडिटी फ्युचर्स ट्रेडिङ कमिसनका नामित अधिकारीलाई सेनेटमा अनुमोदन रोक्नका लागि व्हाइट हाउसमा दबाब दिएको आरोप टायलर विन्कलभसप्रति लगाइएको छ।
प्रकाशित: २८ भाद्र २०८२, शनिबार
